"ევროპული საქართველოს" წევრის, ზურაბ ჭიაბერაშვილის განცხადებით, კანონპროექტი, რომლითაც მთავრობას საგანგებო მდგომარეობის გამოცხადების გარეშე შეზღუდვების დაწესების უფლება წლის ბოლომდე უხანგრძლივდება, ანტიკონსტიტუციური და "სამართლებრივი ნონსენსია."

როგორც მან ჯანდაცვის კომიტეტის დაწყებამდე ჟურნალისტებთან განაცხადა, ამ პროცესის პარალელურად, ხელისუფლებას არ სურს მოქალაქეები უზრუნველყოს იმ აუცილებელი სახსრებით, რაც მათ კრიზისში სჭირდებათ.

"ქართული ოცნების" მთავრობას უნდა ისე შეზღუდოს ჩვენი მოქალაქეების პოლიტიკური, სამართლებრივი, სამოქალაქო უფლებები, რომ პარლამენტშიც არ მოვიდეს და არ წარმოადგინოს კონკრეტული გეგმა, თუ რას აპირებს საგანგებო მდგომარეობის გამოცხადების შემთხვევაში და კრიტერიუმები, თუ რატომ აცხადებს საგანგებო მდგომარეობას. ეს არის ყველანაირი დემოკრატიული ნორმის მოშლა, ანტიკონსტიტუციური და რაც ყველაზე მთავარია, მათ არ უნდათ მოქალაქეებისთვის გაიმეტონ ის აუცილებელი სახსრები, რაც დღევანდელ კრიზისში მოქალაქეებს სჭირდებათ. მათ უნდათ პარლამენტის გვერდის ავლით აკეთონ ის, რაც ბიძინა ივანიშვილს და "ქართულ ოცნებას" მოესურვება," - განაცხადა ჭიაბერაშვილმა.

შეგახსენებთ, პარლამენტში დღეს „საზოგადოებრივი ჯანდაცვის შესახებ“ კანონში ცვლილებებს განიხილავენ, რომლის თანახმად, მთავრობას საგანგებო მდგომარეობის გამოცხადების გარეშე, შემზღუდავი ღონისძიებების გატარების უფლება 2020 წლის ბოლომდე უხანგრძლივდება.

კანონპროექტს დღეს ჯერ ჯანდაცვის კომიტეტი განიხილავს, ხოლო შემდეგ პლენარულ სესიაზე უყრიან კენჭს.