„რად გვინდა ეს გადავადებები, თუ ადამიანები კორონავირუსით კი არა, შიმშილით დაიხოცებიან!“, - ასე მიმართა დამოუკიდებელმა დეპუტატმა პოლიტიკური მოძრაობა „ტრიბუნას“ ლიდერმა, დავით ჭიჭინაძემ, საპარლამენტო უმრავლესობის წევრ დიმიტრი ხუნდაძეს, რომელმაც პარლამენტის რიგგარეშე სხდომაზე „საზოგადოებრივი ჯანდაცვის შესახებ“ კანონში ცვლილებები წარმოადგინა.
ცვლილებების თანახმად, მთავრობას საგანგებო მდგომარეობის გამოცხადების გარეშე, შემზღუდავი ღონისძიებების გატარების უფლება 2020 წლის ბოლომდე უხანგრძლივდება.
„ჯერ კიდევ საგანგებო მდგომარეობის გამოცხადებას მოჰყვა საკმაოდ მძიმე შედეგები ეკონომიკაში, რომელსაც „ოცნების“ მთავრობა არ ითვალისწინებს. ამ გადავადებებით კი, მართლაც უმძიმეს სიტუაციას მივიღებთ, რადგან პრემიერმა გახარიამ ისიც კი ვერ მოახერხა, რომ მისი განცხადება, რომელიც პარლამენტის ამ მაღალი ტრიბუნიდან ორჯერ გააკეთა, ადამიანებისთვის გარანტი გამხდარიყო და ბანკებს და მიკროსაფინანსოებს მართლა პროცენტის დარიცხვის გარეშე გადაევადებინათ შემოსავლების გარეშე დარჩენილებისთვის სესხები“,- აცხადებს დავით ჭიჭინაძე.
მან დიმიტრი ხუნდაძეს მიმართა, რომ პარლამენტმა ადამიანების მდგომარეობა გაითვალისწინოს.
„იქნებ პარლამენტმა მაინც გაითვალისწინოს ადამიანების მდგომარეობა და იძულების წესით მაინც მოხდეს ფორსმაჟორის ამოქმედება, თორემ ისეთ უმძიმეს სიტუაციას მივიღებთ, კორონა კი არა, შიმშილით დაიხოცებიან ადამიანები!“-განაცხადა ჭიჭინაძემ.
ინფორმაციას პოლიტიკური მოძრაობა „ტრიბუნა“ ავრცელებს.