ფრაქცია "ნაციონალური მოძრაობის" თავმჯდომარე რომან გოცირიძე მიიჩნევს, რომ "ელექტრონული კომუნიკაციების შესახებ" კანონპრპოექტი უკან უნდა გაიწვიონ.
როგორც დეპუტატმა ჟურნალისტებთან განაცხადა, ცვლილებების პროექტში "მახინჯი იდეები" კვლავ რჩება.
"ის, რომ სასამართლოს ნებართვის გარეშე ვერ შევა სპეციალური მმართველი, სჯობს იმას, რაც იყო აქამდე, მაგრამ ეს არავითარი კომპრომისი არ არის. რჩება ყველა მახინჯი იდეა, რაც იყო ჩადებული და ეს ინვესტიციებს ამ დარგში სერიოზულ პრობლემას შეუქმნის. კანონპროექტი ძალიან დიდ ბერკეტებს აძლევს ხელისუფლებას ჩაერიოს ბიზნესსაქმიანობაში, საკუთრების უფლებაში. დროებითი მმართველის დანიშვნის პირობებში მას შეუძლია მთლიანად გაანადგუროს კომპანია. ძალიან ცუდი ინიციატივაა და ეს უნდა გაიწვიონ,"- განაცხადა გოცირიძემ.
ცნობისათვის, "ელექტრონული კომუნიკაციების შესახებ“ კანონში დაგეგმილი ცვლილებების პროექტს პირველი მოსმენით კენჭს დღეს უყრიან.
ცვლილებების თანახმად, კომუნიკაციების კომისიას დამატებითი ფუნქციები ენიჭება. კანონპროექტის თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას და აღსრულების დაყოვნებამ ან ავტორიზაციის შეჩერებამ/ლიცენზიის გაუქმებამ შეიძლება ზიანი მიაყენოს სახელმწიფო ან საზოგადოებრივ უსაფრთხოებას, ქვეყნის ეკონომიკურ ინტერესს ან ბაზარზე არსებულ კონკურენტულ გარემოს, კომისია უფლებამოსილია, დანიშნოს სპეციალური მმართველი, რომელიც უზრუნველყოფს კომისიის გადაწყვეტილების აღსრულებას.