სომხეთ-აზერბაიჯანის საზღვარზე მიმდინარე მოვლენებმა, შესაძლოა, მთელი რეგიონის უსაფრთხოებაზე მოახდინოს ზეგავლენა, - აზერბაიჯანული მედიის ინფორმაციით, ამის შესახებ რუსეთის საგარეო საქმეთა მინისტრის მოადგილე ანდრეი რუდენკომ განაცხადა.
„ეს ძალიან რთული პრობლემაა. შეშფოთებულები ვართ იმით, რაც მოხდა. სამწუხაროდ, შეტაკება გრძელდება. ყველაზე საშიში კი ისაა, რომ ამან, შესაძლოა, მთელი რეგიონის უსაფრთხოებაზე მოახდინოს ზეგავლენა. ახლა ჩვენი ნომერ პირველი მოვალეობაა, საზღვარზე სისხლისღვრა შევაჩეროთ,“- განაცხადა რუდენკომ.
შეგახსენებთ, სომხეთ-აზერბაიჯანის საზღვარზე მდგომარეობა 12 ივლისს დაიძაბა. მხარეები ცეცხლის გახსნაში ერთმანეთს ადანაშაულებენ. დაპირისპირების შედეგად როგორც სომხეთის, ასევე აზერბაიჯანის შეიარაღებული ძალების რამდენიმე ჯარისკაცი დაიღუპა და დაიჭრა.