ესპანეთში კორონავირუსით გარდაცვლილთა ხსოვნას პატივი მიაგეს. სამგლოვიარო ცერემონია მადრიდის სამეფო სასახლესთან გაიმართა.
ოფიციალურ ღონისძიებაში მონაწილეობა მიიღეს ესპანეთის მეფე ფილიპემ და პრემიერ-მინისტრმა პედრო სანჩესმა. ასევე, საპატიო სტუმრებს შორის იყვნენ ევროპელი მაღალჩინოსნები - ევროკომისიის პრეზიდენტი ურსულა ფონ დერ ლეიენი, ევროსაბჭოს პრეზიდენტი ჩარზლ მიშელი, ჯანდაცვის მსოფლიო ორგანიზაციის გენერალური დირექტორი ტედროს ადჰანომ გებრეიესუსი. ცერემონიას ესწრებოდნენ ესპანეთის რეგიონული მთავრობის წარმომადგენლები და ყოფილი პრემიერ-მინიტრები. სულ ღონისძიებაზე 400-მდე სტუმარი იყო მიწვეული.
როგორც ესპანეთის მეფე ფილიპემ გარდაცვლილთა ნათესავებს განუცხადა, ისინი მარტო არ არიან და მათ ტკივილს ყველა ესპანელი იზიარებს.
ესპანეთი კორონავირუსის პანდემიით ევროპაში ერთ-ერთი ყველაზე მეტად დაზარალებული ქვეყანაა. კოვიდ-19-ს ესპანეთში 28 000-ზე მეტი ადამიანი ემსხვერპლა, ხოლო კორონავირუსით დაინფიცირების 300 000-ზე მეტი შემთხვევა გამოვლინდა.