ალექსანდრე კობაიძე - გამოძიება ე.წ. ოქროს მოწმეს, გურამ ამირხანაშვილს უფრთხილდება

ფეხბურთელ გიორგი შაქარაშვილის გარდაცვალების საქმეზე დაკავებული მორაგბეების, ვასილ მახარაძისა და არჩილ გაგნიძის ადვოკატი, ალექსანდრე კობაიძე მიიჩნევს, რომ გამოძიება ე.წ. ოქროს მოწმეს, გურამ ამირხანაშვილს უფრთხილდება. სწორედ აღნიშნულით ხსნის კობაიძე იმ ფაქტს, რომ საქმის ახალ ტომში გურამ ამირხანაშვილის სავარაუდოდ, მეხუთედ გამოკითხვის ოქმი არ დევს.

როგორც „ინტერპრესნიუსთან“ საუბარში ადვოკატი განმარტავს, საგამოძიებო უწყებამ ამირხანაშვილთან საქმის ფაქტობრივი გარემოებები არ დააზუსტა.

„მოგეხსენებათ, გურამ ამირხანაშვილი გამოკითხვაზე მეხუთედ დაიბარეს. მთელი რიგი ფაქტობრივი გარემოებები იყო დასაზუსტებელი, რაც გამოძიებამ არ დააზუსტა. სავარაუდოდ, გამოძიება, ამირხანაშვილს უფრთხილდება, ცივ ნიავს არ აკარებს და არ უნდა, რამე დისკომფორტი განიცადოს, რადგან ერთადერთი „ოქროს მოწმე“ ჰყავთ. გამოძიება ფაქტია, რომ ამირხანაშვილის იმედზეა, ეს მოწმე რომ არ ჰყავდეთ, ის ბრალი, რაც ჩემი დაცვის ქვეშ მყოფებს აქვთ, ვერ ექნებათ.

მთელი რიგი უზუსტობებიდან გამომდინარე, ჩვენ ვაპირებთ, ის გამოვკითხოთ, დროები დავაზუსტოთ, რამ განაპირობა ჩვენებების შეცვლა და ა.შ.“, - აცხადებს კობაიძე.

ცნობისთვის, გურამ ამირხანაშვილი გარდაცვლილი ფეხბურთელის, გიორგი შაქარაშვილის მეგობარია. ის არაგვის ხიდზე მომხდარი ინციდენტის შემდეგ, თბილისიდან ჩასულმა „ტოიოტა ქამრის“ მარკის ავტომობილმა თბილისში ჩამოიყვანა. მანქანაში მჯდომ პირებს საგამოძიებო უწყება ამირხანაშვილის თავისუფლების უკანონოდ აღკვეთასაც ედავება.

უფლებადამცველების განცხადებით, გურამ ამირხანაშვილმა ჩვენება რამდენჯერმე შეცვალა და ის არასანდო მოწმეა.

როგორ გაართვა თავი განათლების სისტემამ სწავლების დისტანციურ რეჟიმს? - პირველი სემესტრის შედეგებს განათლების მინისტრის მოადგილე აჯამებს
ქართული პრესის მიმოხილვა 18.01.2021
პაატა ცაგარეიშვილი  - საქართველოს სატრანზიტო შესაძლებლობები იმ შემთხვევაში აღმოჩნდება საფრთხის ქვეშ, თუ სომხეთი ახლო მომავალში შეძლებს გახდეს სატრანზიტო ქვეყანა
D ვიტამინის გავლენა რეპროდუქციულ ჯანმრთელობაზე