გაეროს ადამიანის უფლებათა საბჭოს სესიაზე საქართველოს ოკუპირებულ რეგიონებში უკანონო დაკავებებსა და ადამიანის უფლებების მხრივ არსებულ რთულ ვითარებაზე ისაუბრეს

გაერო-ს ადამიანის უფლებათა საბჭოს 44-ე სესიაზე, რომელზეც გაერო-ს ადამიანის უფლებათა უმაღლესი კომისრის ოფისმა რეზოლუციის „თანამშრომლობა საქართველოსთან“ შესრულების ზეპირი ანგარიში წარადგინა, სიტყვით ჟენევაში გაეროს განყოფილებასთან და სხვა საერთაშორისო ორგანიზაციებთან საქართველოს მუდმივი წარმომადგენელი, ალექსანდრე მაისურაძე გამოვიდა.

როგორც „ინტერპრესნიუსს“ საგარეო საქმეთა სამინისტროდან აცნობეს, თავის გამოსვლაში ალექსანდრე მაისურაძემ რუსეთის მიერ საქართველოს ოკუპირებულ ტერიტორიებზე ადამიანის უფლებების კუთხით შექმნილ რთულ ვითარებაზე, მშობლიურ ენაზე განათლების მიღების, საკუთრების და თავისუფალი გადაადგილების უფლებების დარღვევაზე ისაუბრა.

უწყების ცნობით, მუდმივმა წარმომადგენელმა განსაკუთრებული ყურადღება გაამახვილა უკანასკნელ შემთხვევაზე, რომელიც რუსეთის საოკუპაციო ძალების მიერ საქართველოს მოქალაქის, ზაზა გახელაძის დაჭრას და უკანონო დაკავების ფაქტს ეხება. ალექსანდრე მაისურაძემ აღნიშნა, რომ ადგილობრივი მშვიდობიანი მოსახლეობის მისამართით საოკუპაციო ძალების მხრიდან ცეცხლის გახსნა წარმოადგენს რუსეთის ფედერაციის მიერ ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმების უხეშად დარღვევის მორიგ მაგალითს, ასევე პანდემიის პირობებში გლობალური მასშტაბით ცეცხლის შეწყვეტის შესახებ გაეროს გენერალური მდივნის მოწოდების სრულ უგულებელყოფას.

საქართველოს მუდმივი წარმომადგენლის განცხადებით, მიუხედავად COVID-19 პანდემიისა, რუსეთის ფედერაცია განაგრძობს დესტრუქციულ და პროვოკაციულ ქმედებებს საქართველოს წინააღმდეგ, მათ შორის, საოკუპაციო ხაზის გასწვრივ მავთულხლართების აღმართვის უკანონო პროცესის ინტენსიფიკაციით.

საგარეო უწყების ინფორმაციით, საქართველოს მუდმივმა წარმომადგენელმა აღნიშნა, რომ საოკუპაციო ხაზის გასწვრივ ე.წ. გადასასვლელების ჩაკეტვამ და სასწრაფო სამედიცინო ევაკუაციაზე უარის თქმამ, ადგილზე მძიმე ჰუმანიტარული სიტუაციის კიდევ უფრო გაუარესება და უდანაშაულო ადამიანების სიკვდილიანობის ზრდა გამოიწვია.

მათივე ცნობით, აღსანიშნავია, რომ უმაღლესი კომისრის ზეპირ ანგარიშში განსაკუთრებული ყურადღება დაეთმო რუსეთის მიერ საქართველოს ოკუპირებულ რეგიონებში არსებულ მძიმე ჰუმანიტარულ მდგომარეობას.

„კომისრის ოფისმა კიდევ ერთხელ გამოხატა მწუხარება, რომ მიუხედავად არაერთი მოთხოვნისა, ოფისის წარმომადგენლებს კვლავ არ ეძლევათ ადგილზე ადამიანის უფლებების დაცვის საჭიროებების შეფასების მიზნით, ოკუპირებული აფხაზეთისა და ცხინვალის რეგიონებში შესვლის შესაძლებლობა. კომისრის ოფისმა ხაზგასმით აღნიშნა, რომ რუსეთის მიერ ოკუპირებულ საქართველოს ტერიტორიებზე, 2014-2019 წლებში, სიცოცხლის ხელყოფის ოთხ შემთხვევაზე პასუხისმგებლობის ნაკლებობა აძლიერებს დაუსჯელობის გარემოს, რამაც შეიძლება კიდევ უფრო გააუარესოს არსებული დაძაბულობა და დარღვევები.

რაც შეეხება უმაღლესი კომისრის წერილობით ანგარიშს რეზოლუციის “თანამშრომლობა საქართველოსთან” შესრულებისა და ქვეყნის ოკუპირებულ ტერიტორიებზე არსებული ვითარების შესახებ, ის გაერო-ს ადამიანის უფლებათა საბჭოს, მიმდინარე წლის სექტემბერში დაგეგმილ 45-ე სესიაზე წარედგინება“, - აღნიშნულია საგარეო საქმეთა სამინისტროს მიერ გავრცელებულ ინფორმაციაში.

გიორგი ანთაძე - საქართველომ რეგიონში არსებული სამხედრო დისბალანსის გათვალისწინებით, თავისი თავდაცვის შესაძლებლობების გაუმჯობესებისკენ უფრო ქმედითი ნაბიჯები უნდა გადადგას
ქართული პრესის მიმოხილვა 03.08.2020
ალექსანდრე თვალჭრელიძე -  გაბრაზებული ამომრჩევლები ხმას მცირე პარტიებს მისცემენ, პარლამენტის გასაღები სწორედ მცირე პარტიების და  ახალი სახეების ხელშია
„ციტადელი“ მომხმარებელს ახალ შოურუმში ეპატიჟება
როგორ ვისარგებლოთ თიბისი ფეის აპლიკაციით
კრედო ბანკსა და ევროპის საინვესტიციო ბანკს შორის მიკრო, მცირე და საშუალო ბიზნესების ხელშესაწყობად 36 მილიონი ლარის მოცულობის საფინანსო ხელშეკრულება გაფორმდა