პრეზიდენტი დონალდ ტრამპი აცხადებს, აშშ-ის დიდ ქალაქებში მიმდინარე ანტირასისტული საპროტესტო აქციების გასაკონტროლებლად კიდევ უფრო მეტ ფედერალურ სამართალდამცავს გააგზავნის.

მისივე თქმით, აშშ-ის ბევრი ქალაქის, მათ შორის ჩიკაგოსა და ნიუ-იორკის, „ლიბერალ დემოკრატ“ ლიდერს მოქმედების ეშინია.

„სამართალდამცავებს გავაგზავნით. ვერ დავუშვებთ, რომ ეს ხდებოდეს ჩვენს ქვეყანაში, ჩვენს ქალაქებში,“- განაცხადა დონალდ ტრამპმა.

აშშ-ის პრეზიდენტის განმარტებით, ძალადობის ფაქტებს ადგილი აქვს ნიუ-იორკში, ჩიკაგოში, ფილადელფიაში, ბალტიმორსა და ოკლენდში და აღნიშნა, რომ ამ ქალაქებს „ლიბერალ დემოკრატი“ მერები ჰყავთ.

შეგახსენებთ, ანტირასისტული საპროტესტო აქციები აშშ-ში მაისის ბოლოს, აფრო-ამერიკელი ჯორჯ ფლოიდის გარდაცვალებას მოჰყვა. 46 წლის ფერადკანიანი მამაკაცი პოლიციის მიერ დაკავებისას გამოჩენილი ძალადობის შედეგად შეუძლოდ გახდა და ექიმებმა მისი გადარჩენა ვერ მოახერხეს.