თორნიკე შარაშენიძე პრეზიდენტის განცხადებაზე - ჯობდა წინასწარ გაერკვია უკრაინის პოზიცია, ურთიერთობების განახლებაზე ჯერ არასაჯაროდ, წყნარად ეთქვა

საგარეო ურთიერთობათა საკითხებში ექსპერტის, თორნიკე შარაშენიძის შეფასებით, საქართველოს პრეზიდენტის განცხადება უკრაინასთან ურთიერთობების განახლებაზე საჭირო ნაბიჯია. თუმცა მისივე თქმით, უკეთესი იქნებოდა, აღნიშნულ საკითხზე პოზიციების გარკვევა ორ ქვეყანას შორის, საწყის ეტაპზე, არასაჯაროდ მომხდარიყო. შარაშენიძის განცხადებით, უკრაინასა და საქართველოს შორის ურთიერთობებში გარკვეული ხარვეზი არამხოლოდ სააკაშვილის ფაქტორმა, არამედ ყირიმის ანექსიის დროს საქართველოს ხელისუფლების დუმილმა გააჩინა.

„უკრაინასა და საქართველოს შორის გაბუტვას ჰქონდა ადგილი, რაც ჩემი აზრით, არამხოლოდ სააკაშვილის, არამედ იმის გამოც იყო, რომ ყირიმის ანექსიის შემდეგ საქართველოს მთავრობამ ძალიან ფრთხილი პოზიცია გამოიჩინა და საერთოდ გაწყვიტა ოფიციალურ კიევთან ურთიერთობები. ბუნებრივია, ამანაც იმუშავა. პრინციპში, ზურაბიშვილის ეს განცხადება ჭკვიანური და საჭიროა, მათ შორის ამ ხელისუფლების ინტერესებსშიც შედის უკრაინასთან შერიგება, მაგრამ პირადად მას ეს რამდენად გამოუვა, ძნელია ამის თქმა. მე მგონი ჯობდა, ურთიერთობების განახლებაზე ჯერ არასაჯაროდ, წყნარად ეთქვა, წინასწარ გაერკვიათ უკრაინის პოზიცია და დალაპარაკებოდა. ახლა ასე, საჯაროდ წინაპირობების წამოყენება ალბათ, არ არის სწორი იქიდან გამომდინარე, რომ უკრაინაც ნაწყენია,“ - განაცხადა შარაშენიძემ.

რაც შეეხება სალომე ზურაბიშვილის მიერ მიხეილ სააკაშვილის განცხადებებზე ხაზგასმასა და უკრაინის ხელისუფლებისადმი მიმართვას, რომ „მოახდინოს საგულისხმო გავლენა“, თორნიკე შარაშენიძე აცხადებს, რომ საჯაროდ წინაპირობების წამოყენებას მანამდე წყნარად საუბარი სჯობდა.

„სააკაშვილის ფაქტორი გასაგებია. საქართველოს ხელისუფლებას ლეგიტიმური საფუძველი აქვს, რომ გაღიზიანებულიყო სააკაშვილის განცხადებების გამო. მაინც, თანამდებობაზეა და იქიდან ამბობს, რომ ჩამოვალ, ხელისუფლებას შევცვლი, ხელისუფლება არალეგიტიმურია, მოღალატეები არიან და ა.შ. გასაგებია, რომ გაბრაზების ლეგიტიმური საფუძველი აქვთ, მაგრამ ასევე უკრაინასაც აქვს განაწყენების მიზეზი. ამიტომაც საჯაროდ წინაპირობის წამოყენებას ჯობია წყნარად დაელაპარაკოს მანამდე,“ - განაცხადა შარაშენიძემ.

შეგახსენებთ, საქართველოს პრეზიდენტი, სალომე ზურაბიშვილი, მზადყოფნას გამოთქვამს, შეეცადოს უკრაინასა და საქართველოს შორის ურთიერთობებისა და ტრადიციული მეგობრობის განახლებას. ამასთან, იგი ხაზს უსვამს, რომ „საქართველოს მთავრობის მიმართ პროვოკაციული ტონი, რომელიც მომდინარეობს უცხო ქვეყნის სამსახურში მყოფი, უცხო ქვეყნის მოქალაქისგან, უარყოფითად მოქმედებს ორმხრივ ურთიერთობებზე.“

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 01.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა