პრეზიდენტად არჩევის შემთხვევაში, არჩევნებში უცხო ქვეყნების ჩარევას საწინააღმდეგო აქტად განვიხილავ და ეს მნიშვნელოვან გავლენას მოახდენს ასეთი ქვეყნების მთავრობებსა და აშშ-ის შორის ურთიერთობებზე, - ამის შესახებ აშშ-ის ყოფილი ვიცე-პრეზიდენტის ჯო ბაიდენის მიერ გავრცელებულ განცხადებაშია აღნიშნული. მისივე თქმით, არ სურს, აშშ-სა და რუსეთს ან სხვა რომელიმე ქვეყანას შორის დაძაბულობის ესკალაცია და ურჩევნია, კორონავირუსის პანდემიის წინააღმდეგ სხვა ქვეყნებთან ერთად იბრძოლოს, მაგრამ აცხადებს, რომ ნებისმიერ ქვეყნას, რომელიც აშშ-ის დემოკრატიაში ჩაერევა, შესაბამის პასუხს გასცემს.

„თუკი რომელიმე უცხო ძალა ჩვენს დემოკრატიაში ჩარევას აირჩევს, უყოყმანოდ გავცემ პასუხს“, - აღნიშნა ბაიდენმა. მან აშშ-ის სადაზვერვო სამსახურს მოუწოდა, უცხო ქვეყნების მთავრობების მიერ აშშ-ის არჩევნებში ჩარევის ან ჩარევის მცდელობის შესახებ ნებისმიერი ინფორმაცია დროულად გაასაჯაროონ.

„მივმართავ აშშ-ის სადაზვერვო სამსახურს, დროულად გაასაჯაროონ უცხო ქვეყნების მთავრობების მიერ აშშ-ის არჩევნებში ჩარევის ან ჩარევის მცდელობის შესახებ ნებისმიერი ინფორმაცია. გამოვიყენებ ყველა საშუალებას, რომ ასეთმა ქვეყნებმა აშკარა და გრძელვადიანი შედეგები იგრძნონ“, - წერს ჯო ბაიდენი.

შეგახსენებთ, ორი დღის წინ ჯო ბაიდენმა განაცხადა, რომ მისი ინფორმაციით, რუსები კვლავ ცდილობენ აშშ-ის საარჩევნო პროცესში ჩარევას. ინფორმაციას Abc News-ი ავრცელებს.