„კახი კახიშვილმა ძალიან დიდი შეცდომა დაუშვა, როდესაც ამ ბრძოლაში შემოვიდა“ , – ამის შესახებ პოლიტიკური მოძრაობა „ტრიბუნას“ ლიდერმა, დავით ჭიჭინაძემ განაცხადა, რითაც გამოეხმაურა „ქართული ოცნების“ მხრიდან კახი კახიშვილის მაჟორიტარ კანდიდატად დასახელებას.

დეპუტატი სასჯელაღსრულების ყოფილი მინისტრის საქმიანობის დროს გამოვლენილი გადაცდომების გასაჯაროვებას აანონსებს.

„ჭიჭინაძის ფაქტორი ისნის რაიონში იმდენად რთული აღმოჩნდა „ოცნებისთვის“, რომ კახი კახიშვილი დააბრუნეს. კახიშვილი, თავის მხრივ, ყოველთვის ცდილობდა წარმოჩენილიყო როგორც სუფთა და პატიოსანი პოლიტიკოსი, მაგრამ მის საქმიანობაში უამრავი გადაცდომაა და ყველა ფაქტი, დოკუმენტებით დადასტურებული მას წინ დაედება. მოკლედ, რასაც ყველაზე ძალიან „უფრთხილდებოდა“ იმას დაკარგავს ზუსტად და ამის გარანტიას მე ვაძლევ“, - აცხადებს ჭიჭინაძე.

აღნიშნულ კომენტარს „ტრიბუნას“ პრესსამსახური ავრცელებს.