აშშ-ის სახელმწიფო მდივანი მაიკ პომპეო ოფიციალური ვიზიტით დიდ ბრიტანეთს ესტუმრა. ბრიტანეთის პრემიერ-მინისტრმა ბორის ჯონსონმა ამერიკელ მაღალჩინოსანს ლონდონში, დაუნინგ-სტრიტზე მდებარე რეზიდენციაში უმასპინძლა. მხარეებმა პირისპირ შეხვედრა რეზიდენციის ბაღში, ღია ცის ქვეშ გამართეს.

ჯონსონმა აღნიშნა, რომ სოციალური დისტანციის ზომები რაიმე სახის დიპლომატიურ დისტანციაზე არ მიუთითებს.

„როიტერის“ ინფორმაციით, პომპეოს ლონდონში ვიზიტის ფარგლებში განსახილველ საკითხებს შორის არის გლობალური პრიორიტეტები, მათ შორის კორონავირუსის პანდემიით დაზარალებული ეკონომიკის აღდგენის გეგმა, ჩინეთთან ურთიერთობები, 5G ქსელები და „ბრექსითის“ პირობებში თავისუფალი სავაჭრო შეთანხმება.