ფაქტია, რომ არ მუშაობს ინციდენტების, პრევენციისა და მათზე რეაგირების მექანიზმი. ამ ფორმატში შეხვედრები შეჩერებულია , - ამის შესახებ სახალხო დამცველმა ნინო ლომჯარიამ ჟურნალისტებს განუცხადა, რითაც უპასუხა კითხვას, საოკუპაციო ძალების წარმომადგენლების მიერ კასპის მუნიციპალიტეტიდან საქართველოს მოქალაქის გატაცების ფაქტთან დაკავშირებით.
ლომჯარიას თქმით, სამწუხაროდ, ქართული მხარე დარჩენილია ყოველგვარი კომუნიკაციის, თუ მოლაპარაკების ფორმატის გარეშე, რაც, რა თქმა უნდა, ძალიან მძიმედ აისახება საოკუპაციო ხაზის გასწვრივ მცხოვრებ ჩვენს მოქალაქეებზე.
„მათი გატაცების, თუ არასათანადო მოპყრობის შემთხვევებში ჩვენ ან ძალიან დაგვიანებულად ვიღებთ ინფორმაციას, ან ხშირ შემთხვევაში არ ვიღებთ და ოჯახსაც დღემდე არ აქვს ობიექტური ინფორმაცია მათი ოჯახის წევრის ჯანმრთელობის მდგომარეობის თაობაზე. რა თქმა უნდა, ამ თვალსაზრისით მექანიზმი არაეფექტურია“, - განაცხადა ლომჯარიამ.