ქუთაისში, ელისო ჩეჩელაშვილის მკვლელობისთვის ბრალდებული 45 წლის ქალის აღკვეთის ღონისძიებაზე სასამართლო დღეს იმსჯელებს.

45 წლის ქალი მეზობლის მკვლელობას აღიარებს, მოტივად კი ეჭვიანობას ასახელებს. კერძოდ, ბრალდებულის ინფორმაციით, ჩეჩელაშვილს მის მეუღლესთან ჰქონდა ურთიერთობა.

ცნობისთვის, შემთხვევა ქუთაისში 18 ივლისს მოხდა. სამართალდამცავებმა 45 წლის ქალი დააკავეს, რომელმაც თავის მეგობარ ახალგაზრდა ქალს სტუმრად ყოფნის დროს, ურთიერთშელაპარაკების ნიადაგზე, ცივი იარაღით 20-მდე ჭრილობა მიაყენა და ადგილიდან მიიმალა.

გამოძიება სსკ-ის 108-ე მუხლით მიმდინარეობს, რაც განზრახ მკვლელობას გულისხმობს. ამავე საქმეზე დანაშაულის შეუტყობინებლობისთვის დაკავებულია კიდევ ორი პირი, ისინი იმ ბინის მცხოვრებლები არიან, სადაც მკვლელობა მოხდა.

იხილეთ ვიდეო:სასამართლო ქუთაისში ქალის მკვლელობისთვის ბრალდებული ქალისთვის აღკვეთის ღონისძიების შეფარდებაზე იმსჯელებს