27 ივლისს, ჰუალინგის თიზ-ის ინიციატივითა და მსოფლიო თავისუფალი ზონების ორგანიზაციასთან (World FZO) პარტნიორობის ფარგლებში, ონლაინ ვებინარი “თავისუფალი ზონების როლი ეკონომიკური გაჯანსაღების გზაზე” გაიმართება . ამის შესახებ „ინტერპრესნიუსს“ „ჰუალინგიდან“ აცნობეს.
„COVID-19 პანდემიამ კიდევ ერთხელ გვაჩვენა, რომ მსოფლიოს მოწინავე ქვეყნებიც კი, მოუმზადებელნი აღმოჩნდნენ ეკონომიკური ვარდნით გამოწვეული სხვადასხვა სოციალურ-ეკონომიკური გამოწვევების ეფექტიანად გადაწყვეტაში. გლობალური თვითიზოლაციის პირველივე დღეებიდან, ჩვენი მიზანი იყო აღნიშნული გამოწვევები გადაგვექცია ახალ შესაძლებლობებად არა მხოლოდ კომპანიის, არამედ სახელმწიფოს დონეზეც.
მსოფლიო თავისუფალი ზონების ორგანიზაციისა და ჰუალინგის თიზ-ის მიერ ინიცირებული ვებინარი მიეძღვნება ჩვენი ცოდნისა და გამოცდილების გაზიარებას 50 000-ზე მეტი კომპანიის წარმომადგენლისთვის მსოფლიოს 126 ქვეყნიდან, სადაც წარმოვაჩენთ საქართველოს, როგორც ერთ-ერთ საუკეთესო საინვესტიციო გარემოს პოსტ-პანდემიურ პერიოდში“, - აცხადებს ჰუალინგის თიზ - ის ბიზნეს ანალიზისა და ბიზნესის განვითარების უფროსი აღმასრულებელი, ვახტანგ ჩქარეული.
მათი ინფორმაციით, World FZO გლობალური ორგანიზაციაა, რომელიც წარმოადგენს თავისუფალი ზონების ინტერესებს მთელს მსოფლიოში და წარმოდგენილია სათავო ოფისებით ჟენევასა და დუბაიში.