ველით, რომ აშშ-ის ხელისუფლება მიიღებს საჭირო ზომებს რუსი ჟურნალისტების პირადი უსაფრთხოების უზრუნველსაყოფად, - ამის შესახებ კრემლის პრესსპიკერმა დიმიტრი პესკოვმა განაცხადა.

„შეერთებული შტატების პოლიციის მხრიდან რუს ჟურნალისტებზე განხორციელებული თავდასხმა შემაშფოთებელია. ჩვენ ველით, რომ აშშ-ის ხელისუფლება მიიღებს საჭირო ზომებს რუსი ჟურნალისტების პირადი უსაფრთხოების უზრუნველსაყოფად და ზოგადად, მედიის შეუზღუდავი მუშაობისთვის სათანადო პირობების შესაქმნელად,“- განაცხადა პესკოვმა.

ცნობისათვის, რუსული მედიის ინფორმაციით, აშშ-ის ქალაქ პორტლენდში, სადაც ჯორჯ ფლოიდის გარდაცვალების შემდეგ ანტირასისტული საპროტესტო აქციები მიმდინარეობს, „პირველი არხის“ გადამღებ ჯგუფს ფორმიანი პირები დაესხნენ თავს, რის შედეგადაც ტელევიზიის თანამშრომლები დაშავდნენ.