გურიის რეგიონში სამუშაო ვიზიტის ფარგლებში საქართველოს განათლების, მეცნიერების, კულტურისა და სპორტის მინისტრის მოადგილე, ეკატერინე დგებუაძე, ლანჩხუთის პირველ საჯარო სკოლას ეწვია, სადაც რეგიონის სკოლის დირექტორებსა და „ახალი სკოლის მოდელის“ ადგილობრივ ექსპერტებს შეხვდა. ამის შესახებ „ინტერპრესნიუსს“ საქართველოს განათლების, მეცნიერების, კულტურისა და სპორტის სამინისტროდან აცნობეს.

უწყების ცნობით, მინისტრის მოადგილემ ვრცლად ისაუბრა განათლების სისტემაში მიმდინარე სიახლეებზე, მათ შორის, პანდემიის პირობებში სკოლების მართვის საკითხებზე, ახალი ეროვნული სასწავლო გეგმის დანერგვის პროცესზე, პედაგოგთა გამოცდებსა და სპეცმასწავლებლის პროფესიულ განვითარებაზე. შეხვედრის ბოლოს კი დირექტორების შეკითხვებს უპასუხა.

ვიზიტის ფარგლებში მინისტრის მოადგილე ლანჩხუთის პირველ საჯარო სკოლაში ჩატარებულ სარეაბილიტაციო სამუშაოებსაც გაეცნო. გასულ წელს სამინისტროს ფინანსური მხარდაჭერით სკოლაში მოეწყო სველი წერტილები, მოპირკეთდა სკოლის შიდა ეზო, რომლისთვისაც ბიუჯეტიდან ჯამში 192,416 ლარი გამოიყო.

იხილეთ ვიდეო:ეკატერინე დგებუაძე გურიის რეგიონის სკოლების დირექტორებსა და მასწავლებლებს შეხვდა