პარლამენტის თავმჯდომარის არჩილ თალაკვაძის განცხადებით, აშშ-ის თავდაცვის ავტორიზაციის აქტში საქართველოსადმი მტკიცე მხარდაჭერაა გამოხატული, ყოველგვარი წინაპირობის გარეშე. ამის შესახებ მან ჟურნალისტებს განუცხადა.

„მნიშვნელოვანია, რომ აშშ-ის კონგრესმა მიიღო თავდაცვის ავტორიზაციის აქტი, სადაც საქართველოს მიმართ ძლიერი მხარდაჭერაა გამოხატული და ასევე მხარდაჭერილია ის პროგრესი, რომელსაც ჩვენი ამერიკელი პარტნიორების მხარდაჭერით, ჩვენ, ამ წლების განმავლობაში ხელისუფლებამ და საზოგადოებამ ერთად მივაღწიეთ. იყო არაერთი კრიტიკული მოსაზრება და ოპოზიციის მხრიდან სპეკულაცია. დღეს უკვე მიღებულ დოკუმენტში ნებისმიერს შეუძლია ნახოს, რომ იქ მხარდაჭერა არის გამოხატული ყოველგვარი წინაპირობების გარეშე. რასაკვირველია, საქართველო აგრძელებს თავისი დემოკრატიის გაძლიერებას, აგრძელებეს პროგრესს და კონსოლიდაციას ჩვენი ნომერ პირველი სტატეგიული პარტნიორის აშშ-ის მხარდაჭერით. ჩვენ მადლიერები ვართ, რომ ამერიკის კონგრესის მხრიდან კიდევ ერთი ძლიერი მხადარჭერა მივიღეთ. რასაკვირველია, საქართველოს საგარეო პოლიტიკური კურსი არის მტკიცე, ჩვენ ვაგრძელებთ სვლას ევროკავშირში გაწევრიანებისკენ, სტრატეგიული ურთიერთობების გაძლიერებისკენ აშშ-თან ერთად და რაც მთავარია, საქართველო აგრძელებს საკუთარი დემოკრატიის გაძლიერებას"- განაცხადა თალაკვაძემ.