მიხეილ ჩხენკელი ახალი კლინიკის გახსნაზე - სამინისტრო ყოველთვის თქვენს გვერდით იქნება საშვილიშვილო ინიციატივების განხორციელებაში

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა კენ ვოლკერის სამედიცინო რეაბილიტაციის საუნივერსიტეტო კლინიკის გახსნის ცერემონიაში მიიღო მონაწილეობა. როგორც მინისტრმა განაცხადა, კენ ვოლკერის სახელობის სამედიცინო რეაბილიტაციის საუნივერსიტეტო კლინიკის გახსნა, საქართველოსთვის უაღრესად მნიშვნელოვანი მოვლენაა. ამის შესახებ „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს.

მათივე ცნობით, მინისტრმა ამ პროექტში და საქართველოს სამედიცინო სფეროს განვითარების საქმეში კენ ვოლკერის როლზე გაამახვილა ყურადღება და აღნიშნა, რომ კენ ვოლკერი მსოფლიო მნიშვნელობის მეცნიერია.

„პირველ რიგში, მინდა მთელი გულით მივულოცო ჩვენს საზოგადოებას დღევანდელი დღე, ეს უაღრესად მნიშვნელოვანი მოვლენა – პროფესორ კენ ვოლკერის სახელობის სამედიცინო რეაბილიტაციის საუნივერსიტეტო კლინიკის გახსნა. უღრმესი მადლობა ჩვენს მთავარ სტრატეგიულ პარტნიორს და მეგობარს – ამერიკის შეერთებულ შტატებს. ჩემთვის, როგორც საქართველოსა და ამერიკის ორმაგი მოქალაქისთვის, განსაკუთრებით სასიხარულო და საამაყოა, რომ ამერიკელი ხალხის, ამერიკის მთავრობის დახმარებითა და ჩართულობით ხორციელდება ასეთი უაღრესად მნიშვნელოვანი პროექტები.

განსაკუთრებით მინდა გამოვყო პროფესორ კენ ვოლკერის როლი როგორც ამ პროექტის, ასევე, საქართველოს სამედიცინო სფეროს განვითარების საქმეში. მე პირადად წილად მხვდა მასთან ურთიერთობის ბედნიერება. ეს პიროვნება გახლდათ მსოფლიო მნიშვნელობის მეცნიერი, საქართველოზე უაღრესად შეყვარებული. მას ძალიან ბევრი აქვს გაკეთებული როგორც ამ ცენტრის იდეის შექმნაში, ასევე, ქართველი სტუდენტების განათლების საქმეში. დღესაც ემორისა და ამერიკის სხვა წამყვან უნივერსიტეტებში და, რასაკვირველია, საქართველოში დიდი სიყვარულით იხსენებენ მის სახელს, მის ღვაწლს.

ძალიან დიდია ემორის უნივერსიტეტის როლი ამ ცენტრის განვითარების საქმეში და, ბუნებრივია, ეს თანამშრომლობა გაგრძელდება. დარწმუნებული ვარ, რომ ამ თანამშრომლობას დაემატება ამერიკის სხვა წამყვანი უნივერსიტეტების სამედიცინო ფაკულტეტები და შედეგები იქნება უაღრესად შთამბეჭდავი.

ასევე, უნდა აღვნიშნო, რომ, გარდა მთავარი – კლინიკური მიმართულებისა, რაზეც ჩვენმა კოლეგებმა უკვე ისაუბრეს, უაღრესად მნიშვნელოვანია ცენტრის აკადემიური და სამეცნიერო კვლევითი განზომილებები. კერძოდ, სამედიცინო უნივერსიტეტის სტუდენტებს საშუალება ექნებათ, ამ ცენტრში გაიარონ უაღრესად მნიშვნელოვანი პრაქტიკა. შესაბამისად, ფიზიკური რეაბილიტაციის მიმართულებით მთელი თაობების აღზრდა მოხდება ამ ცენტრში. სამეცნიერო კვლევას, რასაკვირველია, აქვს უაღრესად დიდი მნიშვნელობა, და აქ ჩვენს უცხოელ პარტნიორებთან, ემორის უნივერსიტეტთან და სხვა წამყვან უნივერსიტეტებთან ერთად გაიმართება საკმაოდ მნიშვნელოვანი სამეცნიერო კვლევითი პროცესი, რაც, დარწმუნებული ვარ, კიდევ უფრო გააუმჯობესებს დარგის შედეგებს.

კიდევ ერთხელ გილოცავთ ყველას, წარმატებებს გისურვებთ და მინდა იცოდეთ, რომ განათლების, მეცნიერების, კულტურისა და სპორტის სამინისტრო ყოველთვის თქვენს გვერდით იქნება საშვილიშვილო ინიციატივების განხორციელებაში“, - განაცხადა მიხეილ ჩხენკელმა.

კენ ვოლკერის სახელობის სამედიცინო რეაბილიტაციის საუნივერსიტეტო კლინიკის შექმნის მიზანია რეგიონში პირველი, საერთაშორისო გამოცდილებებზე დაფუძნებული, მაღალკვალიფიციური სარეაბილიტაციო მომსახურებისა და თბილისის სახელმწიფო სამედიცინო უნივერსიტეტის კლინიკური სასწავლო ბაზის შექმნა.

რამაზ საყვარელიძე - თუ „ქოც/ნაცებმა“ მიაღწიეს საწადელს, ისევ დატოვეს ამომრჩეველი ორ პოლუსს შორის, მაშინ არაფერი შეიცვლება, ამ კინოსაც ის დასასრული ექნება, რაც ადრინდელ კინოებს ჰქონდათ
ქართული პრესის მიმოხილვა 23.09.2021
დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
სტერეო +  განცხადებას ავრცელებს
„სს ფუდმარტი“ რიგით მე-500 მაღაზიას ხსნის
„ვითიბი“ ბანკმა ილუზიების მუზეუმის გასახსნელად 700,000 ლარის ოდენობის სესხი გასცა
ვლადიმერ პაპავა - საუბარი, რომ „ვისოლში“ საწვავი არ ჩავასხათ, კონკრეტულ ქსელში საკვები არ ვიყიდოთ, ბიზნესზე ტერორია
საქართველოს უნივერსიტეტი ვაქცინაციის პროცესში ჩაერთო
შპს „ლუკოილ-ჯორჯიამ“ კომპანია „უნიგრუპის“ წინააღმდეგ სასამართლოში სარჩელი შეიტანა