ბიზნეს ასოციაციაში ელექტროგენერაციის წამახალისებელი სქემები განიხილეს

საქართველოს ბიზნეს ასოციაციაში წევრი კომპანიების, ეკონომიკისა და ფინანსთა სამინისტროს წარმომადგენლების მონაწილეობით ელექტროენერგიის ობიექტების მშენებლობის იმ წამახალისებელი გარემოს შექმნაზე იმსჯელეს, რომელიც ამ ინდუსტრიაში ინვესტიციების მოზიდვისა და ენერგეტიკული უსაფრთხოების უზრუნველსაყოფად აუცილებელია. ამის შესახებ „ინტერპრესნიუსს“ საქართველოს ბიზნეს ასოციაციიდან აცნობეს.

მათი ინფორმაციით, შეხვედრაზე ეკონომიკისა და მდგრადი განვითარების სამინისტროს მინისტრის მოდგილე დავით თვალაბეიშვილი, ხოლო ფინანსთა სამინისტროს მინისტრის მოადგილე ნიკოლოზ გაგუა წარმოადგენდნენ.

ასოციაციის წევრი კომპანიებისა და ენერგეტიკულ ინდუსტრიაში ჩართულ დაინტერესებულ მხარეებს ჰქონდათ შესაძლებლობა, საკუთარი ხედვა წარმოედგინათ საქართველოს მთავრობის მიერ 2 ივლისს დამტკიცებული განახლებადი წყაროებიდან ენერგიის წარმოებისა და გამოყენების მხარდაჭერის სქემის (ჰიდროელექტროსადგურები) შესახებ.

„აღნიშნულ დადგენილებასთან დაკავშირებით, კომპანიებმა გამოთქვეს წუხილი, რომ დადგენილებით განსაზღვრული ელექტროენერგიის წამახალისებელი ტარიფები ჰიდროელექტროსადგურების გარკვეული კატეგორიებისთვის, პროექტის ეკონომიკური მიზანშეწონილობის დასასაბუთებლად საკმარისი არ იქნება. ასევე, გამოითქვა სურვილი, რომ წახალისების სქემები გავრცელდეს 5 მეგავატამდე სიმძლავრის ელექტროსადგურებზეც. საუბარი შეეხო ქარის და მზის ელექტროსადგურების მშენებლობის საკითხებსაც, რადგან არსებული დადგენილება მხოლოდ ჰიდროელექტროსადგურებისგან შესასყიდი ელექტროენერგიის ტარიფებს არეგულირებს.

თავის მხრივ, საქართველოს მთავრობის წარმომადგენლებმა ხაზი გაუსვეს იმ ფისკალურ რისკებს, რასაც ელექტროენერგიის შესყიდვის ვალდებულებები საზოგადოდ აჩენს. ასევე, ხაზი გაესვა იმ აუცილებელი ოპტიმალური პირობების შექმნას, როცა, ერთი მხრივ, დაცულია მომხმარებლებისთვის ელექტროენერგიის მიწოდების უსაფრთხოება, ხოლო მეორე მხრივ, არ იქმნება სახელმწიფო ბიუჯეტზე ჭარბი ვალდებულებების დაწოლის საფრთხე“,- აღნიშნულია გავრცელებულ ინფორმაციაში.

„საქართველოს ბიზნეს ასოციაცია მუდმივად წარმოადგენს გარკვეულ ხიდს ბიზნესსა და ხელისუფლებას შორის და, ამასთან, საუკეთესო პლატფორმაა მსგავსი დიალოგის გასამართად. დღევანდელ შეხვედრაზე დავრწმუნდით, რომ არსებობს განსხვავებული ხედვები და მოსაზრებები ენერგეტიკულ სექტორში წარმოდგენილ მხარეებს შორის, შესაბამისად, ვფიქრობ, აუცილებელი იქნება მსგავსი დიალოგის შემდგომი წარმართვა იმისთვის, რომ მოხდეს პოზიციების დაახლოება და ოპტიმალური გამოსავლის მოძიება,“- განაცხადა ასოციაციის პრეზიდენტმა სოსო ფხაკაძემ შეხვედრის დასრულების შემდეგ.

თენგიზ ფხალაძე  - შიდაპოლიტიკურმა შუღლმა საერთო ეროვნული მეორე პლანზე გადაწია, ერთმანეთთან ძიძგილაობაში გართულები სულ უფრო ვემსგავსებით აისბერგისკენ ჯიუტად მიმავალ ტიტანიკს
ქართული პრესის მიმოხილვა 01.03.2021
სახელმძღვანელო სტარტაპერებისთვის - როგორ ხდება კადრების აყვანა კომპანიებში და რა ბენეფიტებს იღებენ დასაქმებულები
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა