აშშ-ს ფედერალური აგენტები და ადგილობრივი სამართალდამცავი ორგანოების წარმომადგენლები ჰიუსტონში მდებარე ჩინეთის საკონსულოში შევიდნენ, მას შემდეგ, რაც აშშ-მა ჩინეთს აღნიშნული საკონსულოს დახურვა მოსთხოვა. ამის შესახებ ინფორმაციას CNN ავრცელებს. CNN-ის ცნობით, რამდენიმე სატვირთო მანქანა და ფურგონი ტერიტორიაზე საკონსულოს დახურვის ვადის ამოწურვის შემდეგ შევიდა. ამ გადაწყვეტილების მიზეზი აშშ-ის სახელმწიფო დეპარტამენტის განცხადებით, „აშშ-ის ინტელექტუალური საკუთრების“ დაცვაა.
ჩინეთის საგარეო საქმეთა სამინისტროს ცნობით, სამშაბათს აშშ-მ ჩინეთს 72 საათი მისცა ჰიუსტონის საკონსულოში ყველა ოპერაციისა და ღონისძიების შესაწყვეტად. ჩინეთის საგარეო საქმეთა სამინისტრომ ამ ნაბიჯს ორ ქვეყანას შორის არსებული დაძაბულობის "უპრეცედენტო ესკალაცია" უწოდა.