„ქართული ოცნების“ ცენტრალურ ოფისთან დეკანოზ გიორგი მამალაძის ძმამ თორნიკე მამალაძემ აქცია - პერფორმანსი გამართა.

როგორც თორნიკე მამალაძემ აღნიშნა, იმის მაგივრად, რომ ქვეყანას განვითარებისა და ევროკავშირისკენ ევლო, „საქართველო რუსეთის კლანჭებში კიდევ ერთხელ მოექცა“.

„პირველ რიგში, მინდა ამ ბოროტების ქარხანას და მის შემოქმედს ბიძინა ივანიშვილს გადავუხადოთ „მადლობა“, მადლობა იმისთვის, რომ დაგვაბრუნა იმ შავბნელ 90-იან წლებში, სადაც იყო ძალადობა, მკვლელობა, იარაღის ჩადება, გაუპატიურება და ა.შ. სადაც იყო ავტომატებით საუბარი და საქმის გარჩევები. ამისთვის გვინდა მადლობა გადავუხადოთ ბიძინა ივანიშვილს, რომ ეს ახალგაზრდებიც დააბრუნა იმ 90-იან წლებში, რომელიც მათ არ აქვთ ნანახი და რომელიც ჩვენ გამოვიარეთ, იმ წარსულში, რომელიც რუსეთთან ასოცირდებოდა,“ - განაცხადა თორნიკე მამალაძემ.