სამხრეთ კორეა რუსი მეზღვაურებისთვის, რომლებიც ქვეყნის პორტში გაჩერებას აპირებენ, კონტროლის მკაცრ ზომებს აწესებს, - ამის შესახებ ინფორმაციას CNN-ი სამხრეთ კორეის ჯანდაცვის სამინისტროზე დაყრდნობით ავრცელებს.

მათივე ინფორმაციით, 3 აგვისტოდან რუსი მეზღვაურები ვალდებულები იქნებიან, სამხრეთ კორეაში გამგზავრებამდე 48 საათით ადრე ქვეყნის ხელისუფლებას კორონავირუსის ტესტის პასუხები წარუდგინონ.

აღსანიშნავია, რომ მიმდინარე თვეში სამხრეთ კორეის პორტ ბუსანში რუსული გემის ეკიპაჟის 44 წევრს კორონავირუსი დაუდასტურდა.

ცნობისათვის, გასული დღე-ღამის განმავლობაში სამხრეთ კორეაში კორონავირუსის 48 ახალი შემთხვევა დადასტურდა და ინფიცირებულთა საერთო რაოდენობა 14 251-მდე გაიზარდა. ქვეყანაში „კოვიდ 19“-ს, პანდემიის დაწყების დროიდან, 300 ადამიანის სიცოცხლე ემსხვერპლა.