თსუ-ს სტუდენტებმა, ჭიათურაში თხილისწყალის მაღაროში საველე პრაქტიკა გაიარეს

ჭიათურის სამთო-გამამდიდრებელ კომბინატს თბილისის ივანე ჯავახიშვილის სახელობის სახელმწიფო უნივერსიტეტის გეოლოგიური დეპარტამენტის სტუდენტები ესტუმრნენ. „ჯორჯიან მანგანეზის“ ინფორმაციით, სტუდენტებმა საველე პრაქტიკა შპს „GM-პერევისის“ კუთვნილ ობიექტზე, თხილისწყალის მაღაროში გაიარეს.

ახალგაზრდები შედარებით ახალგახსნილ გვირაბს ესტუმრნენ და მანგანუმის მოპოვების პროცესს დაესწრნენ, დაათვალიერეს გვირაბის გამაგრების ტიპები, ასევე, იმყოფებოდნენ სანგრევებზე და დასამუშავებელი ველის ქანის აგებულებასაც გაეცნენ.

„ორმაგად სასიხარულოა, რომ ახალგაზრდა თაობა ასეთ რთულ პროფესიას ეუფლება. სტუდენტები არ უშინდებიან ამ სირთულეებს და ეუფლებიან სპეციალობას, რომელიც ჩვენი ქვეყნის ეკონომიკური წინსვლისთვის უდავოდ ძალიან მნიშვნელოვანია. დღეს მათ პრაქტიკულად ხელში გამოსცადეს ის მძიმე იარაღი, რომლითაც სამთოელები ყოველდღიურად თავის სამუშაოს აწარმოებენ. დღევანდელი დღე მათთვის პრაქტიკულ ნაწილში პირველი ნაბიჯებია“, - აღნიშნა „ჯორჯიან მანგანეზის“ შრომის დაცვისა და ტექნიკური უსაფრთხოების ინჟინერმა ალექსანდრე დოღაძემ.

„გეოლოგია ისეთი დარგია, რომლის პრაქტიკული ცოდნა და ნახვა, თეორიულ კურსზე არანაკლებ მნიშვნელოვანია. ეს ბავშვები ჭიათურის ამ მაღაროს შემადგენელ ერთ-ერთ ძირითად მინერალს, ასევე, ამ საბადოს გენეზისს, მადნის ტიპებს და დამუშავების პროცესებს თეორიულად უკვე სწავლობენ, სწორედ ახლა კი ამ თეორიულ ცოდნას, ისინი აქ, მაღაროში პრაქტიკული ნახვით იმტკიცებენ.

მინდა ძალიან დიდი მადლობა გადავუხადო „ჯორჯიან მანგანეზის“ ხელმძღვანელობას, ისინი ძალიან გვეხმარებიან. მაღალკვალიფიციური გეოლოგიური კადრების ჩამოყალიბება ასეთი პრაქტიკების ჩატარების გარეშე, პრაქტიკულად შეუძლებელია“, - ამბობს ივანე ჯავახიშვილის სახელობის სახელმწიფო უნივერსიტეტის ზუსტ და საბუნებისმეტყველო ფაკულტეტის გეოლოგიის დეპარტამენტის ხელმძღვანელი, ბეჟან თუთბერიძე.

როგორც კომპანიაში აღნიშნავენ, „ჯორჯიან მანგანეზისთვის“ მნიშვნელოვანია ახალგაზრდა თაობის გეოლოგებად ჩამოყალიბების პროცესში მონაწილეობის მიღება. კომპანია ყოველთვის მზადაა სტუდენტებს დახმარება აღმოუჩინოს და მათ პროფესიულ განვითარებაში წვლილი შეიტანოს.

რამაზ საყვარელიძე - თუ „ქოც/ნაცებმა“ მიაღწიეს საწადელს, ისევ დატოვეს ამომრჩეველი ორ პოლუსს შორის, მაშინ არაფერი შეიცვლება, ამ კინოსაც ის დასასრული ექნება, რაც ადრინდელ კინოებს ჰქონდათ
ქართული პრესის მიმოხილვა 23.09.2021
დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
სტერეო +  განცხადებას ავრცელებს
„სს ფუდმარტი“ რიგით მე-500 მაღაზიას ხსნის
„ვითიბი“ ბანკმა ილუზიების მუზეუმის გასახსნელად 700,000 ლარის ოდენობის სესხი გასცა
ვლადიმერ პაპავა - საუბარი, რომ „ვისოლში“ საწვავი არ ჩავასხათ, კონკრეტულ ქსელში საკვები არ ვიყიდოთ, ბიზნესზე ტერორია
საქართველოს უნივერსიტეტი ვაქცინაციის პროცესში ჩაერთო
შპს „ლუკოილ-ჯორჯიამ“ კომპანია „უნიგრუპის“ წინააღმდეგ სასამართლოში სარჩელი შეიტანა