გარდაცვლილი თამარ ბაჩალიაშვილის ოჯახის ადვოკატი, მიხეილ რამიშვილი დადებითად აფასებს ბაჩალიაშვილის საქმის თბილისის ცენტრალური კრიმინალური პოლიციის დეპარტამენტისთვის გადაცემას.
ადვოკატის განცხადებით, ახლა პოლიციაზეა დამოკიდებული, თუ რამდენად გასცემენ იმ კითხვებს პასუხს, რომლებიც ოჯახს აქვს.
„დანარჩენი მათზეა დამოკიდებული. ის ნდობა, რომელიც აღარ ჰქონდა ოჯახს ქვემო ქართლის პოლიციის მიმართ, ახლა მათზეა დამოკიდებული, მათ კეთილსინდისიერებაზე, ოპერატიულობაზე და მათ დაჩქარებაზე, რამდენად იქნება ყველა იმ კითხვაზე პასუხი გაცემული, რაც დააკმაყოფილებს ოჯახს და აღადგენს იმ სამართლიანობის განცდას, რაც უნდა არსებობდეს მოსახლეობაში, პირველ რიგში, ოჯახში, რომ დადგინდეს, რას და ვის შეეწირა ამ ულამაზესი ბავშვის სიცოცხლე“, - განაცხადა რამიშვილმა.
ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.
ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.