გიორგი რურუას ჩაუდეს იარაღი, წერტილი! ეს არის მოცემულობა, ეს არის რეალობა, - ამის შესახებ, "ევროპული საქართველოს" ერთ-ერთმა ლიდერმა, ელენე ხოშტარიამ, თბილისის საქალაქო სასამართლოსთან განაცხადა, სადაც "მთავარი არხის" ერთ-ერთი მეწილის, ბრალდებულ გიორგი რურუას საქმეზე სასამართლოს გადაწყვეტილების გამოცხადებას ელოდებიან.
ელენე ხოშტარიას განცხადებით, მნიშვნელობა არ აქვს რა გადაწყვეტილებას მიიღებს სასამართლო, ეს სისტემა აუცილებლად გადაიხდის ფასს გიორგი რურუას პოლიტიკური დევნისთვის.
"სამწუხაროდ, ჩვენ ვცხოვრობთ სახელმწიფოში, სადაც სასამართლო ასრულებს პოლიტიკურ დაკვეთებს. ეს მხოლოდ ჩემი აზრი არ არის, ამაზე ჩვენი პარტნიორები ხმამაღლა საუბრობენ. კონკრეტულად გიორგი რურუას საქმეზე საუბრობს ამერიკა და ევროპარლამენტარები, რომ საქართველოში სასამართლო გამოიყენება პოლიტიკური ნიშნით. გიორგი რურუას ჩაუდეს იარაღი, წერტილი! ეს არის მოცემულობა, ეს არის რეალობა, ის დღეს ამ სისტემის მხრიდან იდევნება", - განაცხადა ელენე ხოშტარიამ.
ცნობისთვის, სხდომა თბილისის საქალაქო სასამართლოში 11:00 საათზეა ჩანიშნული.
გუშინდელ სასამართლო პროცესზე დაცვის მხარემ დასკვნითი სიტყვა წარმოთქვა. საბოლოო სიტყვით ისარგებლა თავად ბრალდებულმაც.
რურუამ კიდევ ერთხელ დააფიქსირა პოზიცია, რომ ის თავს დამნაშავედ არ ცნობს და რომ მისი საქმე გაყალბებულია.