თსუ-ში სტუდენტური ლიტერატურული კონკურსის, „ლიტჰაიკერის“ გამარჯვებულთა დაჯილდოების ცერემონია გაიმართა

ივანე ჯავახიშვილის სახელობის თბილისის სახელმწიფო უნივერსიტეტში სტუდენტური ლიტერატურული კონკურსის, „ლიტჰაიკერის“ გამარჯვებულთა დაჯილდოების ცერემონია გაიმართა. ამის შესახებ „ინტერპრესნიუსს“ თბილისის სახელმწიფო უნივერსიტეტიდან აცნობეს.

მათივე ცნობით, თბილისის სახელმწიფო უნივერსიტეტის რექტორმა გიორგი შარვაშიძემ, რექტორის მოადგილემ ნინო ოკრიბელაშვილმა, პროექტის წლევანდელი პარტნიორი ორგანიზაციის „სულაკაურის გამომცემლობის“ წარმომადგენელმა სულაკაურმა გამარჯვებულები დააჯილდოვეს.

ლიტერატურულ კონკურსზე ისაუბრა თბილისის სახელმწიფო უნივერსიტეტის რექტორმა გიორგი შარვაძიძემ. მისი თქმით, კონკურსისი საშუალებით ბევრი საინტერესო სახე აღმოაჩინეს.

„ძალიან საინტერესო ლიტერატურული კონკურსი დასრულდა, რომელშიც თსუ-ს გარდა ქუთაისის, თელავის, სამცხე-ჯავახეთის, გორის, ბათუმის უნივერსიტეტების სტუდენტებიც მონაწილეობდნენ. ვფიქრობ, საინტერესო დავალება ჰქონდათ სტუდენტებს: უნდა წაეკითხათ წიგნები და შემდეგ ტესტები უნდა ეკეთებინათ. გამარჯვებულებს ვულოცავ, თუმცა, ვთვლი, რომ პროექტის ყველა მონაწილე გამარჯვებულია. სტუდენტური კონკურსებით ბევრი საინტერესო სახე აღმოგვიჩენია და დარწმუნებული ვარ, ამჯერადაც ასე იქნება,“ - აღნიშნა გიორგი შარვაშიძემ.

კონკურსის გამარჯვებულმა, თბილისის სახელმწიფო უნივერსიტეტის სტუდენტმა იაკობ მახარაძემ, რომელმაც „სულაკაურის გამომცემლობისგან“ საჩუქრად მიიღო ფულადი ჯილდო 500 ლარის ოდენობით და 500-ლარიანი ვაუჩერი, თსუ-სგან კი - უნივერსიტეტის გამომცემლობაში დაბეჭდილი წიგნი და საიმიჯო ატრიბუტიკა, კონკურსისადმი საკუთარი ემოცია გამოხატა.

„ვურჩევ ყველა სტუდენტს, განსაკუთრებით მათ, ვისაც ლიტერატურა უყვარს, მიიღონ მონაწილეობა მსგავს კონკურსებში. თვითონ პროცესი ძალიან საინტერესოა, ასევე დიდ ცოდნასაც შეიძენთ. ლიტჰაიკერი კი გამორჩეულია იმით, რომ წიგნის კითხვის პროცესში არაფერს კარგავთ. დასასრულს 10 საუკეთესო და ახალი წიგნი დაგრჩებათ და საინტერესო თავგადასავლები, რომლებიც თქვენს ცხოვრებას გაამრავალფეროვნებს,“ - განაცხადა იაკობ მახარაძემ.

ივანე ჯავახიშვილის სახელობის თბილისის სახელმწიფო უნივერსიტეტმა ამ პროექტით წიგნისმოყვარულ სტუდენტებს ლიტერატურულ სამყაროში მოგზაურობის კიდევ ერთი შესაძლებლობა მისცა. მისი მიზანია ახალგაზრდების წიგნიერების ხელშეწყობა და კონკურსის ფორმით სტუდენტებისთვის მეტი მხატვრული ლიტერატურის შეთავაზება.

წელს პირველად პროექტში 5 რეგიონული უნივერსიტეტის სამივე საფეხურის სტუდენტები ჩაერთვნენ. კონკურსანტებმა პროექტისთვის შერჩეული 10 წიგნი (დაგლას ადამსის "ჰიჩჰაიკერის გზამკვლევი გალაქტიკაში"; ბექა ადამაშვილის "ამ რომანში ყველა კვდება"; არჩილ ქიქოძის "სამხრეთული სპილო"; ნილ გეიმანის "ოკეანე ქუჩის ბოლოს"; ოლდოს ჰაქსლის "კუნძული;" აკა მორჩილაძის "ობოლე"; ანა კორძაია-სამადაშვილის "ზინკა ადამიანი"; აიზეკ აზიმოვის "დასაბამი"; სარა პენიპეკერის "პაქსი"; ჰალდორ ლაქსნესის "თევზის კონცერტი") წაიკითხეს და კონკურსისთვის მომზადებული ტესტები დაწერეს. მეორე ადგილზე გასულმა ლევან ღავთაძემ 300-ლარიანი ვაუჩერი, ხოლო მესამეადგილოსანმა ნინო სარიშვილმა 150-ლარიანი ვაუჩერი მიიღეს.

ასევე, დასაჩუქრდნენ თითოეული ტურის გამარჯვებულებიც, რომელთაც თსუ-მ და „სულაკაურის გამომცემლობამ“ საჩუქრად წიგნები გადასცეს.

„მსგავსი სახის პროექტებში „სულაკაურის გამომცემლობა“ ხშირად ერთვება. მადლობა თსუ-ს ამ შემოთავაზებისთვის. ძალიან საინტერესო პროექტია. ვიმედოვნებ, მონაწილეებსაც მოეწონათ. კონკურსისთვის მრავალფეროვანი წიგნები შევარჩიეთ. ვულოცავ გამარჯვებულებს და პროექტის ყველა მონაწილეს,“- განაცხადა გამომცემლობის მარკეტინგის მენეჯერმა ანა სულაკაურმა.

„ლიტჰაიკერი“ თსუ სტუდენტური პროექტია, რომელიც უკვე მეხუთედ ჩატარდა. 2014 წლიდან პროექტის პარტნიორი გამომცემლობა „პალიტრა L“ იყო, ხოლო 2016 წლიდან - გამომცემლობა „წიგნები ბათუმში“.

პროექტის წლევანდელმა პარტნიორმა „სულაკაურის გამომცემლობამ“ კონკურსის მონაწილეებს წიგნების შეძენისას სპეციალური ფასდაკლების აქცია შესთავაზა.

ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
ქართული პრესის მიმოხილვა 04.03.2021
კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
შეფუთვის ვინტაჟური სტილი და ევროპული სტანდარტების ქარხანა - „ვაკე“ 2021 წელს სიახლეებით იწყებს
იურიდიული პირები პროკრედიტ ბანკში ანგარიშებს დისტანციურად გახსნიან