ისრაელში პოლიციამ, პრემიერ-მინისტრ ბენიამინ ნეთანიაჰუს გადადგომის მოთხოვნით გამართულ აქციაზე, 12 პირი დააკავა. გასულ ღამეს იერუსალიმის ქუჩებში ნეთანიაჰუს წინააღმდეგ ათასობით დემონსტრანტი გამოვიდა.

„როიტერი“ ისრაელის მედიასაშუალებებზე დაყრდნობით წერს, რომ ნეთანიაჰუს სამთავრობო რეზიდენციასთან ღამით დაახლოებით 15 000 მოქალაქე შეიკრიბა. აქციაზე პროტესტის მონაწილეებს ბანერები ეჭირათ, წარწერით - „დამნაშავე მინისტრი“. კვირა ღამით გამართული აქცია ისრაელში ბოლო პერიოდის ანტისამთავრობო აქციებს შორის ყველაზე მასშტაბური იყო.

ოფიციალური რეზიდენციის გარდა, დემონსტრანტები მის საკუთარ სახლთანაც შეიკრიბნენ, ასევე ასობით დემონსტრანტი გამოვიდა თელ-ავივშიც. გარდა იმისა, რომ მოქალაქეები ნეთანიაჰუს მთავრობას კორონავირუსის კრიზისის წინააღმდეგ არაეფექტური რეაგირების გამო აკრიტიკებენ, ქვეყნის პრემიერ-მინისტრის წინააღმდეგ სასამართლოშიც მიმდინარეობს პროცესი. ბრალდების მხარე ნეთანიაჰუს უფლებამოსილების ბოროტად გამოყენებასა და ქრთამის აღებაში სდებს ბრალს.