კორონავირუსის შემთხვევების მატების გამო, ავსტრალიის ხელისუფლებამ ვიქტორიას შტატი კატასტროფის ზონად გამოაცხადა და მელბურნში ღამით "კომენდანტის საათი" აამოქმედა. 5 მილიონიან მელბურნში 6 კვირით უკვე მოქმედებს სახლში დარჩენის განკარგულება, თუმცა ეპიდემია კვლავ ძალებს იკრებს.

"კომენდანტის საათი" 2 აგვისტოდან ყოველ ღამით ადგილობრივი დროით საღამოს 8:00 საათიდან დილის 5:00 საათამდე იმოქმედებს ყველა მოქალაქისთვის, გარდა გამონაკლისი შემთხვევებისა. გარდა ამისა, ამოქმედდა ახალი შეზღუდვები, რომლის თანახმადაც, მელბურნის მოსახლეობას სახლიდან მხოლოდ 5 კილომეტრის მოშორებით შეუძლია გადაადგილება და საყიდლებისა და სეირნობისთვის კონკრეტული დრო აქვს გამოყოფილი. ამასთან, 5 აგვისტოდან ყველა სკოლა დისტანციურ რეჟიმზე გადადის.

ბოლო მონაცემებით, ვიქტორიაში ერთ დღე-ღამეში კორონავირუსის 671 ახალი შემთხვევა დაფიქსირდა და 7 ადამიანი გარდაიცვალა.