საქსტატის მონაცემებით, 2020 წლის ივლისში წინა თვესთან შედარებით საქართველოში ფასების საერთო დონე შემცირდა. კერძოდ, ინფლაციის დონემ წინა თვესთან შედარებით -0.5 % შეადგინა. ივლისში წლიური ინფლაციის დონე კი 5.7 %-ია.

რაც შეეხება საბაზო ინფლაციას , სტატისტიკის ეროვნული სამსახურის მონაცემებით, აღნიშნულმა მაჩვენებელმა 2020 წლის ივლისში, გასული წლის შესაბამის პერიოდთან შედარებით 6.1 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი 5.8 პროცენტით განისაზღვრა.

ყოველთვიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

სურსათი და უალკოჰოლო სასმელების ჯგუფში ფასები შემცირდა 1.6 პროცენტით. კერძოდ, ფასები შემცირდა შემდეგ ქვეჯგუფებზე: ხილი და ყურძენი (-11.7 პროცენტი), ბოსტნეული და ბაღჩეული (-8.2 პროცენტი), შაქარი, ჯემი და სხვა ტკბილეული (-2.7 პროცენტი). ამასთან, ფასები გაიზარდა ყავის, ჩაისა და კაკაოს ქვეჯგუფზე (2 პროცენტი).

ტანსაცმელი და ფეხსაცმლის ჯგუფში დაფიქსირდა ფასების 4 პროცენტიანი კლება. ფასები შემცირდა როგორც ტანსაცმლის (-4.8 პროცენტი), ისე ფეხსაცმლის (-2.7 პროცენტით) ქვეჯგუფებზე.

ივლისში ტრანსპორტის ჯგუფში ფასები გაიზარდა 1 პროცენტით. ფასები გაიზარდა სატრანსპორტო საშუალებების შეძენაზე (1.4 პროცენტი) და პირადი სატრანსპორტო საშუალებების ექსპლუატაციაზე (1.4 პროცენტი).