პირობას ვდებ, რომ არავითარ შემთხვევაში საქართველოში ერთპარტიული და თავგასული მმართველობა აღარ იქნება, - ამის შესახებ ვაკეში ოპოზიციის მაჟორიტარობის კანდიდატმა, ელენე ხოშტარიამ „ევროპული საქართველო" მაჟორიტარობის კანდიდატების წარდგენასთან დაკავშირებით გამართულ ღონისძიებაზე განაცხადა.

„ვაკე-საბურთალოს ოლქში კენჭისყრა ჩემთვის ძალიან მნიშვნელოვანია. ვფიქრობ, სწორედ გადამწყვეტი იქნება თბილისის შუაგულში ადამიანების გულის ნდობის მობრუნება იმისთვის, რომ ამ ქვეყანაში რეალური ცვლილებები მოვიტანოთ. ჩვენ უნდა ვიამაყოთ იმ სიმწიფით, რაც მთლიანად ოპოზიციამ გამოიჩინა ამ ერთი წლის განმავლობაში, შეძლო მთავარ მიზანზე კონცენტრირება. ესაა რეალური ცვლილებები, წინსვლა, ბიძინა ივანიშვილის მოცილება, სისტემის დანგრევა. ეს წელი მთელი ქვეყნისთვის საკმაოდ მძიმე იყო, ადამიანებმა დაკარგეს თვალები. ამასთან, ამ წელს გავიმარჯვეთ ბიძინა ივანიშვილზე და გამოვგლიჯეთ პროპორციული სისტემა. ეს სისტემა მნიშვნელოვანია არა პარტიებისთვის, არამედ ხალხისთვის, რომელმაც უნდა დახუროს ის გვერდი, როდესაც ერთი ადამიანი, ერთი პარტია ან ერთი გუნდი აზის თავზე მოსახლეობას. მე პირობას ვდებ, ყველა ადამიანის წინაშე, რომელიც საკუთარი ჯანმრთელობის ფასად იბრძოდა, რომ არავითარ შემთხვევაში საქართველოში ერთპარტიული და თავგასული მმართველობა აღარ იქნება“, - განაცხადა ხოშტარიამ.