ძლიერი წვიმის შედეგად გამოწვეულმა წყალდიდობამ სამხრეთ კორეაში სულ მცირე 13 ადამიანის სიცოცხლე იმსხვერპლა, - ამის შესახებ ინფორმაციას „ალ-ჯაზირა“ სამხრეთ კორეის კატასტროფებისა და უსაფრთხოების საწინააღმდეგო ღონისძიებების ცენტრალურ შტაბზე დაყრდნობით ავრცელებს.

მათივე ინფორმაციით, ათზე მეტი ადამიანი ამ დრომდე დაკარგულად ითვლება.

გარდა ამისა, სტიქიის გამო დედაქალაქ სეულში 1 000-ზე მეტი ადამიანი იძულებული გახდა, საკუთარი სახლი დაეტოვებინა და თავშესაფარში გადასულიყო.

წყალდიდობის შედეგად ქვეყანაში 5 751 ჰექტარზე მეტი სასოფლო-სამეურნეო მიწის ნაკვეთი, ასევე გზები და ხიდები დაიტბორა. ხელისუფლებამ სტიქიის შედეგებთან გასამკლავებლად 25 000-ზე მეტი სამართალდამცავისა და მოხალისის მობილიზება განახორციელა.

სამხრეთ კორეის კატასტროფებისა და უსაფრთხოების საწინააღმდეგო ღონისძიებების ცენტრალური შტაბის განცხადებით, ქვეყანაში მომავალი დღეების განმავლობაში ამინდის კიდევ უფრო გაუარესებაა მოსალოდნელი.