საფრანგეთის მეცნიერთა საბჭო აცხადებს, რომ ქვეყანა ვირუსის მეორე ტალღისთვის მზად უნდა იყოს, ვინაიდან 2020 წლის შემოდგომაზე ვირუსის გავრცელების დონის მნიშვნელოვანი მატებაა მოსალოდნელი, - ამის შესახებ ინფორმაციას CNN-ი ავრცელებს.

საბჭოს განმარტებით, კორონავირუსის ეპიდემიის კუთხით ქვეყანაში არამდგრადი სიტუაციაა, რომელმაც, შესაძლოა, მიმართულება ნებისმიერ დროს შეიცვალოს. მეცნიერები მოქალაქეებს კორონავირუსთან დაკავშირებით დაწესებული წესების შესრულებისკენ მოუწოდებენ.

„ეპიდემიის მომავალი დიდწილად მოქალაქეების ხელშია, მათ სოციალური დისტანცირების ზომები უნდა დაიცვან, ”- აცხადებენ მეცნიერები.

ცნობისათვის, საფრანგეთის ჯანდაცვის სამინისტრომ გუშინ კორონავირუსთან დაკავშირებული უახლესი მონაცემები გამოაქვეყნა, რომლის თანახმადაც, ქვეყანაში გასული 6 დღის განმავლობაში დღეში, საშუალოდ, ინფიცირების 100 ახალი შემთხვევა ფიქსირდებოდა, რაც აპრილის ბოლო პერიოდის მაჩვენებელს უტოლდება. გარდა ამისა, მოიმატა იმ კოვიდინფიცირებული პაციენტების რაოდენობამაც, რომლებსაც მკურნალობა რეანიმაციურ განყოფილებებში უტარდებათ.