გერმანიაში უკვე არის კორონავირუსის მეორე ტალღა და შესაძლოა ქვეყანა კიდევ უფრო ძლიერი ეპიდემიის წინაშე აღმოჩნდეს, რადგან ადამიანები სოციალური დისტანციის ზომებს უგულებელყოფენ - აცხადებს გერმანელ ექიმთა უმსხვილესი ასოციაცია და პროფესიული გაერთიანება Marburger Bund, რომელიც საავადმყოფოებში დასაქმებული ექიმების თითქმის 70%-ს აერთიანებს.
„ჩვენ უკვე ვართ მეორე ტალღაში“, - აღნიშნა ასოციაციის პრეზიდენტმა სუზანა იონამ.
იგი ასევე აცხადებს, რომ ნორმალური ცხოვრების წესში დაბრუნების ძლიერი წადილი და პრევენციული ზომების იგნორირება გერმანიას დააკარგვინებს იმ პროგრესს, რისი მიღწევაც პირველი ტალღის დროს მოხერხდა.
სუზანა იონამ აღნიშნა, რომ ვიდრე არ იქნება კოვიდ-19-ის სამკურნალო წამალი, ვირუსის გავრცელება უნდა შეჩერდეს, ეს კი მხოლოდ შესაძლებელია სოციალური დისტანციის, ჰიგიენის ნორმებისა და ყოველდღიურად პირბადეების ტარების, ასევე ადგილობრივად კარანტინის შემოღების, გზით.