„ერთიანი ნაციონალური მოძრაობის“ ერთ-ერთი ლიდერი სალომე სამადაშვილი მიიჩნევს, რომ ყოფილი პრეზიდენტი მიხეილ სააკაშვილი ბიძინა ივანიშვილის დამარცხების ფორმულაში გადამწყვეტ როლს ითამაშებს. სამადაშვილის თქმით, მიმდინარეობს მსჯელობა იმაზე, თუ როგორ შეიძლება მიხეილ საააკშვილის პოლიტიკური რესურსი გამოყენებული იყოს.
კითხვაზე, განიხილება თუ არა მიხეილ სააკაშვილის კანდიდატურა პრემიერ-მინისტრად, სამადაშვილმა უპასუხა, რომ თუ როგორ ჩამოყალიბდება პარტიისა და მიხეილ სააკაშვილის პოზიცია, ამას როცა მზად იქნებიან, საზოგადოებას მაშინ აცნობებენ.
„ჩვენ, რა თქმა უნდა, ვფიქრობთ იმაზე, როგორ შეიძლება გამოყენებული იყოს მიხეილ სააკაშვილის პოლიტიკური რესურსი მაქსიმალურად. ბიძინა ივანიშვილის დამარცხების ფორმულაში ვფიქრობთ, რომ ის გადამწყვეტ როლს ითამაშებს. კონკრეტულად როგორ ჩამოყალიბდება თავად მიხეილ სააკაშვილისა და პარტიის პოზიცია, ამას საზოგადოებას მაშინ ვაცნობებთ, როდესაც მზად ვიქნებით“,-განაცხადა სამადაშვილმა.