ნათია თურნავა - კოვიდის პერიოდში „აწარმოე საქართველოში“  გაფართოებული ინდუსტრიული კომპონენტით 22-მა საწარმომ ისარგებლა

ანტიკრიზისული გეგმის ფარგლებში ბიზნესის დახმარება არის ერთ-ერთი მნიშვნელოვანი პრიორიტეტი, - ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ გამართულ ბრიფინგზე განაცხადა.

მისი თქმით, დამტკიცებულია ანტიკრიზისული ბიუჯეტი და სხვა მიმართულებებთან ერთად გაფართოვდა და განახლებული სახით ამოქმედდა „აწარმოე საქართველოში“, რომელიც კოვიდის პერიოდში უფრო მეტად მორგებული გახდა მცირე და საშუალო ბიზნესის დახმარების საჭიროებებზე.

მინისტრმა მედიის წარმომადგენლებს პროგრამის განახლებულ კომპონენტებთან დაკავშირებული სტატისტიკური მონაცემები გააცნო. მისი განცხადებით, მცირე და საოჯახო სასტუმროების საბანკო პროცენტის სუბსიდირების მოთხოვნით სააგენტოს მიმართა 913-მა სასტუმრომ, აქედან 687 უკვე დაფინანსდა და დანარჩენიც უახლოეს დღეებში დაფინანსდება.

„მეორე განახლებული კომპონენტი იყო გაზრდილი საკრედიტო-საგარანტიო სქემა, რომლის მეშვეობითაც პროგრამის „აწარმოე საქართველოში“ ფარგლებში თანაუზრუნველყოფას ვთავაზობთ მცირე და საშუალო ბიზნესებს, რომ მათ შეუფერხებლად შეძლონ ბანკებიდან სესხების აღება. ეს პროგრამა ამოქმედდა ორი წლის წინ, მაგრამ იმ პერიოდში, დიდი მოთხოვნა ამ ტიპის დახმარებაზე არ იყო, რადგან ეკონომიკა ისედაც სწრაფად ვითარდებოდა, ხოლო ახლა, ბოლო ერთი თვის განმავლობაში იმ დროიდან, რაც გაზრდილი ბიუჯეტით ამოქმედდა ეს პროგრამა, უკვე 17-მა საწარმომ ისარგებლა საკრედიტო-საგარანტიო სქემით, მათ შორის არის სამშენებლო მასალების წარმოება, ჯანდაცვასთან დაკავშირებული ბიზნესსაქმიანობა, სასტუმროები და რესტორნები, ტანსაცმლის, ასევე კვების პროდუქტების წარმოება და სასაწყობე მეურნეობა. მოთხოვნა ძალიან მაღალი და მზარდია“, - აღნიშნა ნათია თურნავამ.

კიდევ ერთი კომპონენტი, რომელზეც ეკონომიკის მინისტრმა ისაუბრა, იყო საწარმოების სესხის სუბსიდირება.

„ეს ჩვენი ტრადიციული დახმარებაა, რომელიც ძალიან გაფართოვდა კოვიდის პერიოდში და მოიცვა 200-ზე მეტი დარგი. ამ ბოლო ერთი თვის განმავლობაში, 22-მა საწარმომ ისარგებლა ამ დახმარებით - ეს არის 3416 ახალი სამუშაო ადგილი, რომელიც შეიქმნება განახლებული პროგრამის დახმარებით“, - განაცხადა მინისტრმა.

მისივე ინფორმაციით, იპოთეკური სესხების, იგივე ბინათმშენებლობის სექტორის დახმარების კომპონენტით, დღევანდელი მონაცემებით, 82-მა ადამიანმა შეძლო სარგებლობა და ყველა პროგრამა ჩვეულებრივ რეჟიმში გრძელდება.

ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
ქართული პრესის მიმოხილვა 04.03.2021
კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
შეფუთვის ვინტაჟური სტილი და ევროპული სტანდარტების ქარხანა - „ვაკე“ 2021 წელს სიახლეებით იწყებს
იურიდიული პირები პროკრედიტ ბანკში ანგარიშებს დისტანციურად გახსნიან