გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის მიერ ლაბორატორიული კვლევის შედეგად დადგინდა, რომ 251 ავტოგასამართი სადგურიდან აღებული 252 ერთეული რეგულარის მარკის ბენზინის საწვავის სინჯიდან, მხოლოდ ერთი ნიმუში ვერ აკმაყოფილებდა საქართველოს მთავრობის დადგენილებით განსაზღვრულ ნორმას. ამის შესახებ „ინტერპრესნიუსს“გარემოსდაცვითი ზედამხედველობის დეპარტამენტიდან აცნობეს.

უწყების ინფორმაციით, გარემოსდაცვითი ზედამხედველობის დეპარტამენტმა, აღნიშნულ სამართალდარღვევაზე შესაბამისი რეაგირება მოახდინა.

„გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, 2020 წლის მაისში, საქართველოს მასშტაბით, 251 ავტოგასამართი სადგურიდან 252 ერთეული რეგულარის მარკის ბენზინის საწვავის სინჯი აიღეს. სინჯები შემდგომი კვლევისათვის ლევან სამხარაულის სახელობის სასამართლო ექსპერტიზის ეროვნულ ბიუროში გაიგზავნა. ლაბორატორიული კვლევის შედეგად დადგინდა, რომ 252 სინჯიდან, მხოლოდ ერთი ნიმუში ვერ აკმაყოფილებდა საქართველოს მთავრობის დადგენილებით განსაზღვრულ ნორმას. კერძოდ, რეგულარის მარკის ბენზინის ნიმუშში, ოქტანური რიცხვის მნიშვნელობამ შეადგინა 90 (ნორმა: არანაკლებ 91)“, - ნათქვამია ინფორმაციაში.