ომი თავისთავად არის შეცდომა. მშვიდობას არ აქვს ალტერნატივა, ისტორია აუცილებლად განსჯის დამნაშავეებს, შეცდომებს და ცხადყოფს ყველა იმ კითხვას, რომელიც დღეს საზოგადოებას აქვს, არა მხოლოდ საქართველოში,- ამის შესახებ შერიგებისა და სამოქალაქო თანასწორობის საკითხებში ახალმა სახელმწიფო მინისტრმა თეა ახვლედიანმა ჟურნალისტებს მუხათგვერდის ძმათა სასაფლაოზე განუცხადა. მისი თქმით, საომარ პროცესს წინ მოვლენების მრავალფეროვანი განვითარება და პროვოკაციები ახლდა.

„რუსეთის ფედერაციამ შელახა საქართველოს ტერიტორიული მთლიანობა და განახორციელა მასზე სამხედრო აგრესია. ეს არის ცალსახა. რა თქმა უნდა, ამ პროცესს თან სდევდა მრავალნაირი მოვლენები, განვითარებები, პროვოკაციები. მოხდა ომი, ეს არის შეცდომა“,- განაცხადა მინისტრმა.

როგორც ის აღნიშნავს, ხელისუფლება მოწოდებულია, რომ ოკუპირებულ ტერიტორიებზე არსებული მდგომარეობა კონფლიქტის სრულფასოვან პოლიტიკურ გადაწყვეტამდე, შეამსუბუქოს.

„აგვისტოს რუსეთ-საქართველოს ომი არის ყველაზე ტრაგიკული და უძიმესი თარიღი ჩვენი ქვეყნის უახლეს ისტორიაში, რომელმაც შეიწირა ასობით მშვიდობიანი თანამემამულე, დავკარგეთ მებრძოლი ჯარისკაცები და გმირები, რომლებიც თავისი პატრიოტული სულისკვეთებითა და მამაცი სიცოცხლით კიდევ, დარწმუნებული ვარ, არაერთხელ შეიტანდნენ წვლილს ჩვენი ქვეყნის აღმშენებლობის მშვიდობისა და დამოუკიდებლობის განმტკიცების საქმეში.

დღესაც, 12 წლის შემდეგ, ჩვენი მოსახლეობა როგორც გამყოფი ხაზის გასწვრივ, ასევე, ოკუპირებულ რეგიონებში არის უმძიმეს მდგომარეობაში. ხშირ შემთხვევაში გაუსაძლის ეკონომიკურ-სოციალურ პირობებში.

ვართ მოწოდებული, რომ დავასრულოთ ეს რეჟიმი იმ თვალსაზრისით, რომ ჰუმანიტარულ და ადამიანურ ჭრილში შევამსუბუქოთ ამ ადამიანების მდგომარეობა, კონფლიქტის სრულფასოვან პოლიტიკურ გადაწყვეტამდე“,- განაცხადა ახვლედიანმა.