ჩინეთს, რუსეთსა და ირანს აშშ-ის საპრეზიდენტო არჩევნებში ჩარევა სურთ, - ამის შესახებ აშშ-ის ეროვნული კონტრდაზვერვისა და უსაფრთხოების ეროვნული ცენტრის დირექტორმა უილიამ ევანინამ განაცხადა.

„უცხო ქვეყნები ცდილობენ, გავლენა მოახდინონ ამომრჩევლის გადაწყვეტილებაზე, შეცვალონ აშშ-ის პოლიტიკა, გაზარდონ უთანხმოება ქვეყანაში და ძირი გამოუთხარონ ამერიკელი ხალხის ნდობას დემოკრატიული პროცესის მიმართ. უპირველეს ყოვლისა კი ჩინეთის, რუსეთისა და ირანის ახლანდელი და მომავალი პოტენციური ქმედებები გვაშფოთებს,“- განაცხადა უილიამ ევანინამ.

მისივე თქმით, ჩინეთს არ სურს, არჩევნებში დონალდ ტრამპმა გაიმარჯვოს, რუსეთს - „დემოკრატი“ ჯო ბაიდენის გაპრეზიდენტება არ სურს, ირანი კი აშშ-ის დემოკრატიული ინსტიტუტებისთვის ძირის გამოთხრას ცდილობს.

უილიამ ევანინა განმარტავს, რომ უცხო ქვეყნები ამომრჩეველზე ზეგავლენის მოხდენას, არეულობის შექმნასა და ამერიკელი ამომრჩევლის ნდობისთვის ძირის გამოთხრას ონლაინ დეზინფორმაციისა და სხვა საშუალებებით ცდილობენ.

ცნობისათვის, პრეზიდენტმა დონალდ ტრამპმა გუშინ განაცხადა, რომ რუსეთს, ჩინეთსა და ირანს სურთ, მან არჩევნები წააგოს. კითხვაზე, ცდილობენ თუ არა ეს ქვეყნები აშშ-ის 3 ნოემბრის საპრეზიდენტო არჩევნებში ჩარევას, პრეზიდენტმა უპასუხა, რომ „საჭიროა სიფრთხილის გამოჩენა და ყურადღებით დაკვირვება.“