„ევროპული საქართველოს“ ლიდერი, დავით ბაქრაძე აცხადებს, რომ „ქართული ოცნება“ არის ისევ ის პოლიტიკური ძალა, რომელიც მუდმივად საუბრობს წარსულზე იმიტომ, რომ „არაფერი აქვს სათქმელი მომავალზე“.
როგორც ბაქრაძემ აღნიშნა, საქართველოში პროდასავლური, კოალიციური ხელისუფლება უნდა მოვიდეს, რომელიც იმუშავებს იმაზე, რომ ადამიანებს დღეს არსებული პრობლემები მოუგვაროს და არ დააშინოს ისინი წარსული აჩრდილებით.
„ეს არის ის პოლიტიკური ძალა, რომელიც აშინებს ადამიანებს წარსულით, რომ არ მოითხოვონ უკეთესი მომავალი. ეს არის ძალა, რომელიც აზიანებს წარსულს იმისთვის, რომ ამით დაგვინგრიოს მომავალი. ამიტომ, ერთხელ და სამუდამოდ, ოქტომბრის არჩევნებზე უარი უნდა ვუთხრათ იმ პოლიტიკურ ძალას, რომელსაც არ შეუძლია შემოგვთავაზოს წინსვლა, პრობლემების მოგვარება და იმ თემების გადაწყვეტა, რომლებიც ხალხს დღეს აწუხებს, როგორიცაა, კრიმინალი, უმუშევრობა, სიღარიბე, გაძვირებული ცხოვრება, ამ ყველაფრის ნაცვლად კიდევ ერთხელ გვესმის მუდმივი ბრძოლა წარსულთან და წარსულის გამოყენება, რომ ადამიანებმა უკეთესი ცხოვრება არ მოითხოვონ მომავალში“, - განაცხადა ბაქრაძემ.