კრწანისის რაიონში შვიდი სკვერი მოეწყო

კრწანისის რაიონში შვიდი სკვერი მოეწყო. მათგან ხუთი ორთაჭალაში, ორი კი ფონიჭალაში მდებარეობს. ამის შესახებ ინფორმაციას თბილისის მერია ავრცელებს.

მათივე ინფორმაციით, პროექტის ფარგლებში, აღნიშნულ ტერიტორიებზე დასასვენებელი სივრცეები, კალათბურთისა და ფეხბურთის მოედნები, სატრენაჟორო კომპლექსი, სხვადასხვა ატრაქციონი და გარე განათების ქსელი მოეწყო. ყველა ტერიტორია შემოისაზღვრა ღობითა და საბაღე გაზონით. თითოეული სკვერი გამწვანდა, დაირგო სხვადასხვა ჯიშის ხე-მცენარე. ასევე, დამონტაჟდა სკამები, ნარჩენების სეპარირებისთვის განკუთვნილი ურნები და ტერიტორია დეკორატიული ფილებით მოპირკეთდა.

დასრულებულ სამუშაოებს კრწანისის რაიონის გამგებელი ლევან ჯაფარიძე გაეცნო.

„ადგილობრივ მცხოვრებლებს სურვილი ჰქონდათ, ამ ადგილებში რეკრეაციული სივრცეები მოწყობილიყო, რადგან აღნიშნული ტერიტორიები, ფაქტობრივად, ნაგავსაყრელად იყო ქცეული. თანამედროვე ტიპის სკვერების მოწყობა კრწანისის გამგეობისთვის ერთ-ერთი მნიშვნელოვანი მიმართულებაა. მაქსიმალურად ვცდილობთ, მოსახლეობას რაც შეიძლება მეტი რეკრეაციული სივრცე და დასასვენებელი ადგილი შევუქმნათ. 2018-2020 წლებში 4 ჰექტარამდე სივრცე მოეწყო და გამწვანდა, 2020 წლის დასაწყისიდან დღემდე კი, რაიონს უკვე შვიდი ახალი სკვერი შეემატა. ამჟამად, ვიწყებთ ორი ინოვაციური სივრცის მოწყობას - ორთაჭალაში სამდონიანი სკვერის და ფონიჭალაში მრავალფუნქციური სივრცის, სადაც ამფითეატრი, სკეიტ პარკი, სხვადასხვა გასართობი და ცხოველებისთვის განკუთვნილი ზონები განთავსდება“, - აღნიშნა ლევან ჯაფარიძემ.

,,გორგასალის ქუჩა N39, N41, N91, N111-ში და გულიას ქუჩაზე, ავტოსადგურის მიმდებარედ ახალი რეკრეაციული სივრცეები იმ ტერიტორიებზე განთავსდა, სადაც აქამდე მოსახლეობისთვის დასასვენებელი სივრცეები საერთოდ არ არსებობდა. სკვერი მოეწყო ფონიჭალაში, სადგურის ქუჩაზეც, რომლის ტერიტორია ნაგავსაყრელად იყო ქცეული. დასასვენებელი სივრცე კეთილმოეწყო ასევე, რუსთავის გზატკეცილის N263-ის მიმდებარედ, სადაც გზის საფარიც მოწესრიგდა.

სკვერების მოწყობის სამუშაოებისთვის კრწანისის რაიონის გამგეობის ბიუჯეტიდან 907 000 ლარი გამოიყო. შვიდი ახლადმოწობილი სკვერის გარდა, კრწანისში, დამატებით ექვს მისამართზე საბავშვო გასართობი მოედნები და დასასვენებელი ზონები ეწყობა,“ - ნათქვამია ინფორმაციაში.

ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
ქართული პრესის მიმოხილვა 03.03.2021
კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
იურიდიული პირები პროკრედიტ ბანკში ანგარიშებს დისტანციურად გახსნიან