გერმანიის საგარეო საქმეთა მინისტრის, ჰაიკო მაასის განცხადებით, თუ სასამართლო ზელიმხან ხანგოშვილის მკვლელობასთან რუსეთის კავშირს დაადგენს, მათი რეაქციაც შესაბამისი იქნება. რუსული მედიის ინფორმაციით, ამის შესახებ მაასმა რუსეთის საგარეო საქმეთა მინისტრ სერგეი ლავროვთან შეხვედრის შემდეგ განაცხადა.

მისი თქმით, ამჟამად საქმეს სასამართლო სწავლობს.

„ჩვენ, გერმანიის მთავრობამ გადავწყვიტეთ, რომ სასამართლოს გადაწყვეტილებას დაველოდოთ. ის გადაწყვეტილება, რომელსაც სასამართლო გამოიტანს, ჩვენი რეაქციის საფუძველი გახდება. თუ სასამართლო მკვლელობასთან რუსეთის კავშირს დაადგენს, რა თქმა უნდა, ჩვენი რეაქციაც შესაბამისი იქნება“, - განაცხადა ჰაიკო მაასმა.

თავის მხრივ, რუსეთის საგარეო საქმეთა მინისტრმა სერგეი ლავროვმა განაცხადა, რომ ბერლინში მომხდარ მკვლელობასთან დაკავშირებით რუსეთმა გერმანული მხარის ყველა კითხვას უპასუხა.

„ჩვენმა უწყებებმა გერმანულ მხარეს გადასცეს ყველაფერი, რაც კი შეიძლებოდა. ახლა ჩვენ გვსურს, ვნახოთ რაიმე მტკიცებულება იმ განცხადებებისა, რომლებიც გერმანიის გენერალურმა პროკურატურამ გააკეთა, როდესაც მკვლელობასთან რუსეთის კავშირზე განაცხადა. ჯერჯერობით კონკრეტული პასუხი არ მიგვიღია“, - განაცხადა ლავროვმა.

შეგახსენებთ, საქართველოს მოქალაქე ზელიხან ხანგოშვილი ბერლინში შარშან, აგვისტოში მოკლეს. მკვლელობასთან დაკავშირებით გერმანელმა სამართალდამცავებმა რუსი ეროვნების ვადიმ კ. დააკავეს. მიმდინარე წლის ივნისში გერმანიის ფედერალურმა პროკურატურამ განაცხადა, რომ დაკავებულს ხანგოშვილის მკვლელობა რუსეთის ხელისუფლებამ დაუკვეთა.