სასჯელაღსრულების № 8 დაწესებულება, ე.წ. გლდანის ციხე გიორგი შაქარაშვილის საქმეზე დაკავებული არასრულწლოვანის ზ.ხ.-ს, მორაგბე არჩილ გაგნიძისა და ნიკა რევაზიშვილის ადვოკატებმა დატოვეს.

ადვოკატების ინფორმაციით, მათი დაცვის ქვეშ მყოფებისთვის მხოლოდ ბრალის წარდგენა მოხდა და გამოძიებას მათთვის საქმის მასალები არ გადაუცია.

როგორც პენიტენციური დაწესებულების დატოვების შემდეგ არასრულწლოვან ზ.ხ. - ს ადვოკატმა გიორგი გელხაურმა განაცხადა, მისი დაცვის ქვეშ მყოფი წარდგენილ ბრალდებას არ ეთანხმება და თავს დამნაშავედ არ ცნობს.

„წარმოადგინეს დადგენილება ბრალდების შესახებ და ზ.ხ.-ს წარუდგინეს ბრალი სისხლის სამართლის კოდექსის 109 მუხლის მეორე ნაწილით, რაც განზრახ მკვლელობას გულისხმობს. არანაირი მტკიცებულება არ მოუტანია ამ შემთხვევაში გამოძიებას და გვითხრეს, რომ გადმოგვცემდნენ ამ მტკიცებულებებს. ველოდებით, რომ დაუყონებლივ მივიღოთ მტკიცებულებები, რომლის საფუძველზეც მიიღეს ეს დადგენილება.

ჩემი დაცვის ქვეშ მყოფი არ ეთანხმება ამ ბრალდებას და არ ცნობს თავს დამნაშავედ. მისი პოზიციაა, რომ ის ვასილ მახარაძესთან ერთად იყო მანქანის წამოსაყვანად და საუბრობს, რომ ამას ვასილ მახარაძეც დაადასტურებს. ეს ბრალი არის ვარაუდებზე დაყრდნობით, ამის არანაირი მტკიცებულება არ არსებობს და აუცილებლად ჩამოიშლება სასამართლოში”, - აღნიშნა გიორგი გელხაურმა.

შეგახსენებთ, რომ პროკურატურამ ფეხბურთელ გიორგი შაქარაშვილის საქმეზე „ტოიოტა ქამრის“ მგზავრების - 5 პირის მიმართ სისხლის სამართლებრივი დევნა დაიწყო 109-ე მუხლის მეორე ნაწილის „ე“ ქვეპუნქტით ჩადენილი დანაშაულისთვის, რაც განზრახ ჯგუფურად ჩადენილ მკვლელობას გულისხმობს. აღნიშნულ საქმეზე ბრალი დაუმძიმდათ ვახტანგ ჩიქოვანს, არჩილ გაგნიძეს, ნიკოლოზ რევაზიშვილს, არასრულწლოვნებს ა.ქ.-ს და ზ.ხ.-ს.