ბრალის დამძიმების მიზანია საზოგადოებაში ჩაახშონ განცდა, რომ პროკურატურა არაფერს აკეთებს და საზოგადოების გული მოიგონ წინასაარჩევნოდ , - ამის შესახებ გიორგი შაქარაშვილის საქმეზე ბრალდებული მორაგბის არჩილ გაგნიძის ადვოკატმა ალექსანდრე კობაიძემ გლდანის პენიტენციური დაწესებულების დატოვების შემდეგ განაცხადა.
მისივე თქმით, საქმეში ახალი ფაქტობრივი გარემოებები არ არსებობს და პროკურატურამ დღევანდელ ბრიფინგზე ახალი მტკიცებულებები ვერ წარმოადგინა.
"ჩვენ მივდივართ საქმის მასალების ასაღებად, ჩემი დაცვის ქვეშ მყოფს და დანარჩენ 5 პირს ბრალი უკვე წარედგინათ. ჩემი ინფორმაციით, საქმეში ახალი ფაქტობრივი გარემოებები არ არსებობს, მე მქონდა წვდომა, თუ რა მიმართულებით მიდიოდა გამოძიება, დღევანდელი ბრიფინგიც მეტყველებს იმაზე, რომ მათ ახალი მტკიცებულებები არ აქვთ. ახალი რომ ჰქონოდათ დღეს პროკურატურა გამოვიდოდა და ახალ დეტალებზე ისაუბრებდა. ბრალის დამძიმების მიზანია საზოგადოებაში ჩაახშონ განცდა, რომ პროკურატურა არაფერს აკეთებს და საზოგადოების გული მოიგონ წინასაარჩევნოდ”, - აღნიშნა ალექსანდრე კობაიძემ.