სამართლებრივ სახელმწიფოში ბრალდების წარდგენა და დამძიმება არ უნდა ხდებოდეს ოჯახის მოთხოვნით, ან საზოგადოების დაკვეთით, - ამის შესახებ გიორგი შაქარაშვილის საქმეზე ბრალდებული ნიკოლოზ რევაზიშვილის ადვოკატმა, შოთა კახიძემ განაცხადა.
ადვოკატის თქმით, ბრალის წარდგენის პროცესში ნიკა რევაზიშვილმა ერთმნიშვნელოვნად დაადასტურა, რომ იგი არის უდანაშაულო, რაც შენიშვნის სახით ბრალდების დადგენილებაშიც დაფიქსირდა.
,,მოხდა ბრალდების დადგენილების გაცნობა, გაცნობის პროცესში ნიკა რევაზიშვილმა ერთმნიშვნელოვნად დაადასტურა, რომ იგი არის უდანაშაულო და ბუნებრივია, ვერცერთი საღად მოაზროვნე ადამიანი არჩადენილ დანაშაულს ვერ აღიარებს. ეს დაფიქსირდა შენიშვნის სახით ბრალდების დადგენილებაში, მტკიცებულებები არ გადმოგვცემია. რა შთაბეჭდილებაც დაგვრჩა ბრიფინგიდან და რაზეც ისაუბრა პროკურორმა მათ არანაირი ახალი მტკიცებულება არ გააჩნიათ, მით უფრო მკვლელობის დასამტკიცებლად საკმარისი მტკიცებულებები.
სამართლებრივ სახელმწიფოში ბრალდების წარდგენა და დამძიმება არ უნდა ხდებოდეს ოჯახის მოთხოვნით, ან საზოგადოების დაკვეთით. გამომდინარე იქიდან, რომ ამ ბრალდებას არ გააჩნია რაიმე სახის სამართლებრივი საფუძველი. შეგვიძლია, ვისაუბროთ თუ სხვა რა მოტივაცია ჰქონდა პროკურატურას, იყო ეს პოლიტიკურ, თუ სხვა რაიმე ტიპის მოტივაცია", - განაცხადა შოთა კახიძემ.
შეგახსენებთ, რომ პროკურატურამ ფეხბურთელ გიორგი შაქარაშვილის საქმეზე „ტოიოტა ქამრის“ მგზავრების - 5 პირის მიმართ სისხლის სამართლებრივი დევნა დაიწყო 109-ე მუხლის მეორე ნაწილის „ე“ ქვეპუნქტით ჩადენილი დანაშაულისთვის, რაც განზრახ ჯგუფურად ჩადენილ მკვლელობას გულისხმობს. აღნიშნულ საქმეზე ბრალი დაუმძიმდათ ვახტანგ ჩიქოვანს, არჩილ გაგნიძეს, ნიკოლოზ რევაზიშვილს, არასრულწლოვნებს ა.ქ.-ს და ზ.ხ.-ს.