ბიზნესმენ გოგი თოფაძის შვილიშვილის, ლევან თოფაძის ადვოკატის, გიორგი ანთაძის განმარტებით, მისი დაცვის ქვეშ მყოფს ბუსა ჟვანიასთვის დაზიანებები არ მიუყენებია.

ამასთან ადვოკატის განმარტებით, ლევან თოფაძე გამოძიებას ენდობა და მოთხოვნები არ აქვს.

„ჟვანიას ბრალი შეუმსუბუქდება თუ დაუმძიმდება, ეს საქმეში არსებული სხვა მტკიცებულებების საფუძველზე უნდა გადაწყვიტოს ბრალდების მხარემ და სასამართლომ. გარდა ლევან თოფაძისა, ვინც არ უნდა გააჟღეროს მოთხოვნა, ეს ვერ პოვებს სამართალწარმოების პროცესზე ასახვას“, - განაცხადა ანთაძემ.

კითხვაზე, თუ რას ამბობს ლევან თოფაძე ჟვანიას დაზიანებებთან დაკავშირებით, ანთაძე პასუხობს, რომ ეს კითხვა მას გამომძიებლებმაც დაუსვეს.

„არანაირი ფაქტი აღნიშნულის თაობაზე მისთვის ცნობილი არ არის, რა თქმა უნდა, გამომძიებლის მხრიდან ეს შეკითხვა დასმული იყო და თოფაძემ კატეგორიულად უარყო, რომ მას რაიმე სახით, ან ნებისმიერი საგნით დაზიანება მიეყენებინა ბუსა ჟვანიასთვის. შეკითხვა იყო, პირადად მას ხომ არ მიუყენებია ჟვანიასთვის დაზიანება, რაც ლევან თოფაძემ კატეგორიულად უარყო.

სატელეფონო საუბარი როცა შედგა, რასაც რეალურად ერთმანეთის შეურაცხყოფა მოჰყვა, იქ გაჟღერდა გოგოს სახელი და გვარი, იმ გოგოს გამო, რაღაც უკმაყოფილება იყო, თუმცა, ეს ამ საქმეში არსებითი არ არის“, - აცხადებს ანთაძე.

ცნობისთვის, თბილისში ბიზნესმენ გოგი თოფაძის შვილიშვილი ლევან თოფაძე 2 აგვისტოს დაჭრეს. დაჭრის ფაქტზე დაკავებულია ყოფილი პრემიერ - მინისტრის, ზურაბ ჟვანიას შვილი, ბუსა ჟვანია. დაჭრილი იყო თავად ჟვანიაც. ბუსა ჟვანიას აღკვეთის ღონისძიების სახით პატიმრობა შეეფარდა.