ბელარუსში, გასული ღამის განმავლობაში, არასანქცირებულ საპროტესტო აქციებში მონაწილეობის ბრალდებით 700-მდე ადამიანი დააკავეს, - ამის შესახებ ინფორმაციას სააგენტო Belta ბელარუსის შინაგან საქმეთა სამინისტროს ოფიციალურ წარმომადგენელზე დაყრდნობით ავრცელებს.
როგორც ოლგა ჩემოდანოვამ სოციალურ ქსელ Telegram-ში განაცხადა, შინაგან საქმეთა სამინისტრო „კანონისა და წესრიგის დასაცავად ყველა საჭირო ზომის გატარებას განაგრძობს.“
ბელარუსის შინაგან საქმეთა სამინისტროში აცხადებენ, რომ 9-13 აგვისტოს პერიოდში მოქალაქეების „მართლსაწინააღმდეგო ქმედებების შედეგად“, 103 სამართალდამცველი დაშავდა, რომელთაგან 28 საავადმყოფოებშია გადაყვანილი.
მათივე ინფორმაციით, პოლიციამ დააკავა ორი ახალგაზრდა, 18 და 19 წლის, რომლებიც მინსკში ე.წ. „მოლოტოვის კოქტეილებს“ ამზადებდნენ.
შეგახსენებთ, ბელარუსში 9 აგვისტოს საპრეზიდენტო არჩევნების წინასწარი შედეგების გამოცხადების შემდეგ საპროტესტო აქციები მიმდინარეობს. ქვეყნის ცენტრალური საარჩევნო კომისიის მიერ გამოქვეყნებული წინასწარი შედეგების თანახმად, მოქმედ პრეზიდენტ ალექსანდრე ლუკაშენკოს ამომრჩეველთა 80,23 %-მა დაუჭირა მხარი, მისმა მთავარმა მეტოქემ, სვეტლანა ციხანოვსკაიამ კი - ამომრჩეველთა 9,9 %-ის მხარდაჭერა მოიპოვა.
იხილეთ ვიდეო: ბელარუსში, გასული დღე-ღამის განმავლობაში, საპროტესტო აქციის 700-მდე მონაწილე დააკავეს