დღეს სასამართლომ მიიღო კიდევ ერთი სამარცხვინო გადაწყვეტილება, ფაქტობრივად ბრალდების მხარე მოგვევლინა მანტიამოსხმულ მოსამართლეში, - ამის შესახებ გიორგი შაქარაშვილის საქმეზე ბრალდებული არასრულწლოვანის ზ.ხ.-ს ადვოკატმა გიორგი გელხაურმა სასამართლო სხდომის დასრულების შემდეგ განაცხადა.
ადვოკატის თქმით, როგორც სასამართლოს, ასევე ბრალდების მხარეს უკვე მიღებული აქვს გადაწყვეტილება, რომ მოხდეს საზოგადოების ნაწილის ინტრესების დაკმაყოფილება და "ტოიოტა ქამრის" ყველა მგზავრი 109-ე მუხლით მოხვდეს ციხეში.
"პროკურატურამ მოითხოვა 2-კვირიანი ვადა, რომ საქმე წასულიყო სასამართლოში. დღევანდელი გადაწყვეტილებით სასამართლომ მოგვიკლა ყველანაირი გონივრული ვადის შესაძლებლობა, რომ დაცვის მხარე მომზადებულიყო მკვლელობის ნაწილში მტკიცებულების მოპოვებაში, გარკვეული მოწმეთა ჩვენებების ამოკითხვაში და გვითხრა, რომ საერთოდ არ აინტერესებს დაცვის მხარე რას წარმოადგენს. სასამართლომ ჩვენ მოგვეცა 9 - დღიანი ვადა, რომ მოვემზადოთ ამ მძიმე ბრალდების სისხლის სამართლის საქმეში და ფაქტობრივად დაცვის უფლება მოგვიკლა.
ეს საქმე სამართლებრივი სივრციდან გასულია და როგორც სასამართლოს, ასევე ბრალდების მხარეს უკვე მიღებული აქვს გადაწყვეტილება, რომ მოხდეს საზოგადოების ნაწილის ინტრესების დაკმაყოფილება და "ტოიოტა ქამრის" ყველა მგზავრი 109-ე მუხლით მოხვდეს ციხეში", - აღნიშნა გიორგი გელხაურმა.
ცნობისთვის, შაქარაშვილის დამამძიმებელ გარემოებაში განზრახ მკვლელობის ბრალდებით დაკავებული 5 პირის წინასასამართლო სხდომა 27 აგვისტოს გაიმართება.