ლატვიის, ლიეტუვასა და ესტონეთის პრემიერ-მინისტრებმა ერთობლივი განცხადება გაავრცელეს და ბელარუსის ხელისუფლებას ძალადობის შეწყვეტისა და ხელახალი არჩევნების ჩატარებისკენ მოუწოდეს.
„ღრმა შეშფოთებას გამოვხატავთ ხელისუფლების მიერ ოპოზიციის წინააღმდეგ განხორციელებული ზეწოლისა და პოლიტიკური რეპრესიის გამო. ბელარუსის ხელისუფლებას მოვუწოდებთ, მშვიდობიანი დემონსტრანტების წინააღმდეგ ძალადობის განხორციელებაზე უარი თქვას და ყველა პოლიტიკური პატიმარი და აქციის დროს დაკავებული პირი გაათავისუფლოს“, - აღნიშნულია ლატვიის, ლიეტუვასა და ესტონეთის პრემიერ-მინისტრების მიერ გავრცელებულ ერთობლივ განცხადებაში.
მათივე თქმით, ხელახალ არჩევნებს საერთაშორისო დამკვირვებლები უნდა დაესწრნონ. შეგახსენებთ, ბელარუსში 9 აგვისტოს ჩატარებული საპრეზიდენტო არჩევნების შემდეგ საპროტესტო აქციები არ წყდება.