კრემლში ვერ ხედავენ იმის აუცილებლობას, რომ ბელარუსს სამხედრო დახმარება გაუწიონ კოლექტიური უსაფრთხოების შესახებ შეთანხმების ორგანიზაციის ფარგლებში, - ამის შესახებ კრემლის პრესსპიკერმა დიმიტრი პესკოვმა განაცხადა.

„თქვენ იცით, რომ ახლა არ არსებობს ასეთი აუცილებლობა და ბელარუსის ხელისუფლებამ თავადაც აღიარა ეს“, - განაცხადა პესკოვმა.

კითხვაზე, მიდის თუ არა საუბარი ბელარუსისთვის სამხედრო დახმარების თაობაზე საგარეო საფრთხის შემთხვევაში, ან რევოლუციის შემთხვევაში, პესკოვმა უპასუხა: „მე უკვე ვუპასუხე თქვენ კითხვას“.

ჟურნალისტის თხოვნაზე, კომენტარი გაეკეთებინა მედიაში გავრცელებულ ინფორმაციაზე, რომ ბელარუსის საზღვართან იგზავნება რუსული სამხედრო ტექნიკის კოლონები, პესკოვმა განაცხადა, რომ „რუსეთის სამხედრო ტექნიკა განთავსებულია რუსეთის მთელ ტერიტორიაზე, ამიტომ აქ საკომენტარო არაფერია“.

„ჩვენ გამოვდივართ იქიდან, რომ ბელარუსები თავად გადაწყვეტენ თავის პრობლემებს დიალოგის ფარგლებში, სამართლებრივ ჩარჩოში და გარედან ყოველგვარი ჩარევის გარეშე“, - განაცხადა კრემლის პრესსპიკერმა.